दाङमा सर्पले डसेर प्रधानाध्यापकको मृत्यु

दाङको राजपुर गाउँपालिका–३ खरदरियामा सर्पको टोकाइबाट एक जनाको मृत्यु भएको छ । मृत्यु हुनेमा ५५ वर्षीय शालिकराम यादव रहेका छन् । जिल्ला प्रहरी कार्यालय दाङका सूचना अधिकारी प्रहरी नायब उपरीक्षक चक्रबहादुर शाहका अनुसार यादवलाई आज बिहान घरभित्रै सर्पले डसेको थियो । सर्पदंशपछि गम्भीर अवस्थामा रहेका उनलाई तत्काल राप्ती स्वास्थ्य विज्ञान प्रतिष्ठान, घोराही पुर्‍याइएको थियो। तर उपचारको क्रममा आजै उनको निधन भएको प्रहरीले जनाएको छ ।

स्व. यादव शङ्कर माध्यमिक विद्यालय, खरदरियाका प्रधानाध्यापक थिए। लामो समयदेखि शिक्षण पेशामा आबद्ध रहेका यादवको निधनले विद्यालय परिवारमा शोक छाएको छ । स्थानीय बासिन्दाका अनुसार उनी समर्पित शिक्षक तथा समाजसेवीको रूपमा चिनिन्थे । प्रहरी र स्थानीयबासीले सर्पको पहिचान खुल्न नसकेको जनाएका छन् । गर्मीयाममा सर्पदंशका घटना बढ्ने गरेकाले सतर्कता अपनाउन चिकित्सकहरूले आग्रह गरेका छन् ।