ललितपुरको कोणवहालमा जुवाखालाबाट ११ जना पक्राउ

ललितपुर महानगरपालिका–२२ स्थित कोणवहालमा रहेको एक घरमा जुवा खेलिरहेको अवस्थामा प्रहरीले ११ जनालाई पक्राउ गरेको छ। पक्राउ पर्नेमा सोही घरका धनी प्रेम महर्जनसहित अन्य १० जना रहेका छन्।महानगरीय प्रहरी वृत्त जावलाखेलको टोलीले विशेष सूचनाका आधारमा छापा हानी उनीहरूलाई पक्राउ गरेको हो। प्रहरीले उनीहरूलाई जुवा खेलिरहेको अवस्थामा नगद रकम, तासका पत्ता र अन्य केही सामाग्रीसहित नियन्त्रणमा लिएको जनाएको छ।

प्रहरीका अनुसार पक्राउ परेका सबै जनामाथि सार्वजनिक शान्ति सुरक्षाविरुद्धको कसुरअन्तर्गत मुद्दा दर्ता गरिएको छ। उनीहरूलाई आवश्यक अनुसन्धान तथा कानुनी प्रक्रिया अघि बढाइएको प्रहरीले जनाएको छ।यसअघि पनि ललितपुरका विभिन्न स्थानमा अवैध रूपमा जुवा सञ्चालन भइरहेको सूचनाका आधारमा प्रहरीले निगरानी बढाएको थियो। प्रहरीले यस अभियानलाई अझ सशक्त बनाउने बताएको छ।