- असार २६, २०८२
- No Comment
- 68
सुर्खेतबाट साढे ५ किलो लागुऔषधसहित १ जना पक्राउ

सुर्खेत। सुर्खेत प्रहरीले ठूलो परिमाणको लागुऔषध (अफिम)सहित एक जनालाई पक्राउ गरेको छ। जिल्लाको भेरीगंगा नगरपालिका-१०, छिन्चु बजारबाट करिब साढे ५ किलो अफिम जस्तो देखिने पदार्थसहित जाजरकोटका एक व्यक्तिलाई नियन्त्रणमा लिइएको हो।
जिल्ला प्रहरी कार्यालय सुर्खेतका अनुसार, बुधबार साँझ करिब ६ बजे छिन्चु बजारमा खटिएको प्रहरी टोलीले विशेष सुराकीको आधारमा शंकास्पद रूपमा हिँडिरहेका एक व्यक्तिलाई रोकी चेकजाँच गरेको थियो। चेकजाँचका क्रममा जाजरकोटको जुनिचाँदे गाउँपालिका-१०, सिर्पा निवासी ४६ वर्षीय जय बहादुर बस्नेतको साथबाट उक्त परिमाणको लागु औषध बरामद भएको हो।
प्रहरीका अनुसार बस्नेतले पछाडि भिरेको कालो रङ्गको झोलाभित्र उक्त अफिम लुकाई ल्याएका थिए। बरामद गरिएको अफिम जस्तो देखिने पदार्थको तौल ५ किलो ५४० ग्राम रहेको प्रहरीले जनाएको छ।
पक्राउ परेका बस्नेतलाई जिल्ला प्रहरी कार्यालय सुर्खेतमा राखी लागु औषध (नियन्त्रण) ऐन, २०३३ अनुसार थप अनुसन्धान तथा कानुनी कारबाही अगाडि बढाइएको छ। प्रहरीले घटनाका बारेमा थप अनुसन्धान गरिरहेकाे जनाएकाे छ।