किसमिस खाने बानीले शरीरमा ल्याउँछ चमत्कारिक परिवर्तन

 सुकेको अंगूर अर्थात् किसमिस, आकारमा सानो देखिए पनि स्वास्थ्यका लागि भने अचम्मको वरदान सावित हुँदै आएको छ। प्राचीन आयुर्वेददेखि आधुनिक विज्ञानसम्म यसलाई सुपरफूडको रूपमा मानिएको छ। दैनिक एक मुट्ठी किसमिस खाने बानीले शरीरमा थुप्रै फाइदाहरू ल्याउने विज्ञहरूको भनाइ छ।

स्वास्थ्य विशेषज्ञहरूका अनुसार किसमिसमा पाइने घुलनशील फाइबरले पाचन प्रणालीलाई दुरुस्त बनाउने गर्छ। बिहान खाली पेटमा भिजेको किसमिस खानाले पेट सफा हुन्छ र कब्जियतको समस्या हट्छ।

रक्तअल्पता भएका व्यक्तिहरूका लागि किसमिस प्राकृतिक औषधि जस्तै हो। यसमा प्रशस्त मात्रामा आइरन र तामाको मात्रा पाइन्छ, जसले रातो रक्तकोष बनाउने कार्यमा सहयोग पुर्‍याउँछ। साथै, यसमा भएको क्याल्सियमले हड्डी बलियो बनाउने काम गर्छ, जुन महिला र वृद्धवर्गका लागि विशेष लाभदायक मानिन्छ।

मुटुको स्वास्थ्यका लागि समेत किसमिस उत्तिकै उपयोगी छ। यसमा रहेका पोटासियम र फाइबरले कोलेस्ट्रोल नियन्त्रणमा राख्दै हृदयघात र उच्च रक्तचापको जोखिम कम गर्ने गर्दछ।

किसमिसमा रहेको एन्टिअक्सिडेन्ट र भिटामिन सी ले छालालाई चम्किलो र कपाललाई मजबुत बनाउँछ। दैनिक किसमिस सेवनले समयभन्दा पहिला चाउरी पर्नबाट जोगाउँछ।

यति मात्र होइन, यसमा प्राकृतिक चिनीको मात्रा उच्च हुने भएकाले किसमिस ऊर्जा दिनेको उत्कृष्ट स्रोत पनि हो। दिनभर थकित महसुस गर्नेहरूले बिहान भिजेको किसमिस खाँदा शरीरमा ताजगी महसुस हुने गर्छ।

कसरी खाने त किसमिस ?
राति एक मुट्ठी किसमिस पानीमा भिजाएर बिहान खाली पेटमा सेवन गर्नुपर्छ। यसरी खाँदा शरीरले पोषक तत्वहरू सजिलैसँग अवशोषण गर्न सक्छ।

स्वास्थ्यप्रेमीहरूका लागि यो सानो देखिने सुकेको फल दैनिक आहारमा समावेश गर्नुपर्ने अत्यावश्यक वस्तु हो। अबदेखि नै तपाईं पनि आफ्नो दिनको सुरुवात किसमिसबाट गर्न थाल्नुस् – फाइदाहरू आफैं महसुस गर्नुहुनेछ।