सुर्खेतमा सवारी ज्यान मुद्दामा दुई वर्ष कैद सजाय पाएका फरार प्रतिवादी एक वर्षपछि पक्राउ

सुर्खेत। जिल्ला प्रहरी कार्यालय, सुर्खेतले सवारी ज्यान मुद्दामा अदालतबाट दोषी ठहर भई फरार रहेका एक व्यक्तिलाई पक्राउ गरेको छ। दैलेखको भगवतीमाई गाउँपालिका–३ घर भई हाल सुर्खेतको वीरेन्द्रनगर नगरपालिका–१ मा बस्दै आएका ३३ वर्षीय मनोज कुमार थपामगरलाई प्रहरीले शनिबार पक्राउ गरेको हो।

जिल्ला प्रहरी कार्यालय सुर्खेतका अनुसार, थपामगरलाई सुर्खेत जिल्ला अदालतले २०८० जेठ २५ गते सवारी ज्यान मुद्दामा दुई वर्ष कैद सजाय सुनाएको थियो। अदालतको फैसलापछि फरार रहेका उनलाई प्रहरीले एक वर्षभन्दा बढी समयपछि वीरेन्द्रनगर–१ बाटै पक्राउ गर्न सफल भएको हो।

प्रहरी नायव उपरीक्षक तथा सूचना अधिकारी मोहन विक्रम केरुङले पक्राउ परेका थपामगरलाई फैसला कार्यान्वयनका लागि आइतबार सुर्खेत जिल्ला अदालतमा पेश गरिएको जानकारी दिए।