संसद् अवरोध: सभामुखको पहलमा प्रमुख पाँच दलसँग छलफल

राष्ट्रिय स्वतन्त्र पार्टी (रास्वपा)ले संसद् अवरोध जारी राखेपछि सभामुख देवराज घिमिरेले प्रमुख पाँच दलका नेताहरूसँग छलफल सुरु गरेका छन्।

छलफलमा कानुन, न्याय तथा संसदीय मामिला मन्त्री अजयकुमार चौरसिया, उपसभामुख इन्दिरा राना, एमाले मुख्य सचेतक महेशकुमार बर्तौला, नेपाली कांग्रेसका प्रमुख सचेतक श्यामकुमार घिमिरे,

माओवादी केन्द्रका प्रमुख सचेतक हितराज पाण्डे, रास्वपाका प्रमुख सचेतक सन्तोष परियार र राप्रपाका प्रमुख सचेतक ज्ञानबहादुर शाही सहभागी छन्।

यसै क्रममा रास्वपा सांसदले निलो रिबन लगाएर संसद् प्रवेश गरेको विषयमा केही सांसदहरूले सभामुखको ध्यानाकर्षण गराएका छन्। उनीहरूले यस्तो गतिविधिलाई अमर्यादित भन्दै नियन्त्रण गर्न आग्रह गरेका थिए।

सभामुख घिमिरेले सो विषयमा गम्भीर ध्यान दिएको बताउँदै संसदीय मर्यादाभित्र बस्नु सांसद तथा दलहरूको कर्तव्य भएको टिप्पणी गरेका छन्। साथै, उनले आफू स्वनियमनको पक्षमा रहेको स्पष्ट पारेका छन्।