सुर्खेत — यु–१६ राष्ट्रिय क्रिकेटका उत्कृष्ट खेलाडीलाई ग्रेस इन्टरनेशनलको छात्रवृत्ति

ग्रेस इन्टरनेशनलले यु–१६ राष्ट्रिय क्रिकेट प्रतियोगितामा उत्कृष्ठ प्रदर्शन गर्ने सात प्रदेशका खेलाडीलाई छात्रवृत्ति प्रदान गरेको छ। मिड भ्याली एसएस कलेज, सानोठिमी भक्तपुरको सहकार्यमा, प्रत्येक प्रदेशका एक जना खेलाडीलाई कक्षा ११ र १२ निःशुल्क अध्ययन गर्ने अवसर प्रदान गरिएको हो। वीरेन्द्रनगरमा जारी प्रतियोगितामा उत्कृष्ठ ठहरिएका खेलाडीहरू — रबिन मण्डल (कोशी), रुपेश यादव (मधेश), रोमन भट्टराई (बाग्मती), प्रकाश खनाल (गण्डकी), दक्ष ठाकुर (लुम्बिनी), कैलाश खड्का (कर्णाली) र लोकेश चन्द (सुदूरपश्चिम) लाई छात्रवृत्तिसहितको प्रमाणपत्र प्रदान गरिएको हो।

कालुङचोक क्रिकेट मैदानमा बिहीबार आयोजित एक विशेष समारोहमा कर्णाली प्रदेशका पूर्व मुख्यमन्त्री राजकुमार शर्माले खेलाडीहरूलाई प्रमाणपत्र हस्तान्तरण गरेका थिए।ग्रेस इन्टरनेशनल सुर्खेतका निर्देशक विशाल ढकालका अनुसार युवा खेलाडीहरूलाई प्रोत्साहन र सम्मान गर्न यो छात्रवृत्ति कार्यक्रम सुरु गरिएको हो। कार्यक्रममा ग्रेस इन्टरनेशनलले नेपाल क्रिकेट संघ कर्णाली प्रदेशलाई क्रिकेट खेल सामग्री पनि प्रदान गरेको थियो।