आजको मौसम : यी प्रदेशमा वर्षा र हिमपातको सम्भावना 

काठमाडौं ।देशमा पश्चिमी वायु, स्थानीय वायु र बङ्गालको खाडीबाट भित्रिएको जलवाष्पयुक्त हावाको प्रभावका कारण आज पनि विभिन्न भागमा मौसम बदली रहने र वर्षाको सम्भावना रहेको छ। जल तथा मौसम विज्ञान विभाग, मौसम पूर्वानुमान महाशाखाका अनुसार विशेषगरी देशका पहाडी तथा हिमाली क्षेत्रहरूमा वर्षा र हिमपातको सम्भावना रहेको छ।

हाल देशका पहाडी भू-भागमा आंशिकदेखि सामान्य बदली रहेको छ भने सुदूरपश्चिम र कर्णाली प्रदेशको केही भागमा मेघगर्जन र चट्याङ्गसहित हल्का वर्षा भइरहेको छ। दिउँसोको समयमा कोशी, बागमती, गण्डकी, कर्णाली लगायतका प्रदेशका पहाडी भू-भागमा हल्कादेखि मध्यम वर्षा हुन सक्ने पूर्वानुमान गरिएको छ। केही हिमाली क्षेत्रमा भने हल्का हिमपातको सम्भावना पनि रहेको छ।

रातको समयमा देशका पहाडी क्षेत्रहरूमा मौसम आंशिकदेखि सामान्य बदली रहनेछ भने बाँकी भागमा आंशिक बदलीदेखि सफा रहने अनुमान गरिएको छ।

महाशाखाले मौसमको यो अवस्थाले दैनिक जनजीवन, कृषि कार्य, स्वास्थ्य सेवा, सडक यातायात र हवाई उडानमा असर पार्न सक्ने भएकाले आवश्यक सतर्कता अपनाउन सर्वसाधारणलाई आग्रह गरेको छ। विशेषगरी हिमाली तथा पहाडी क्षेत्रमा यात्रा वा कृषि कार्यमा संलग्न जनतालाई आवश्यक तयारी र सावधानी अपनाउन अनुरोध गरिएको छ।