जंगली च्याउ खाँदा एकै परिवारका १० जना बिरामी

तनहुँमा जंगली च्याउ खाँदा एकै परिवारका १० जना बिरामी परेका छन्। म्याग्दे गाउँपालिका-६ सर्वलाङका ३० वर्षीय नारायण मगरले आफ्नै बारीमा उम्रिएको जंगली च्याउ टिपेर ब्यास नगरपालिका-६ शान्तिटोलमा बस्ने आफ्ना मामा गुरुबहादुर पुलामीको घरमा लगेका थिए। आइतबार राति पकाएर खाएको केही समयपछि उनीहरू सबै बिरामी परेका हुन्।

जिल्ला प्रहरी कार्यालय तनहुँका अनुसार बिरामी भएका सबैलाई दमौलीस्थित प्रदेश अस्पतालमा भर्ना गरिएको छ। उनीहरूलाई वान्ता हुने, पखाला लाग्ने र रिङ्गटा लाग्ने जस्ता समस्या देखिएको छ।

बिरामी परेकामध्ये ६३ वर्षीय गुरुबहादुर पुलामी, उनका छोरा ३१ वर्षीय सुरेन्द्र पुलामी, ३० वर्षीय नारायण मगर, उनकी २३ वर्षीया श्रीमती पवित्रा मगर, ४२ वर्षीय ज्वाइँ लित बहादुर थापा, ३६ वर्षीय केशव पुलामी, ६५ वर्षीया सिता पुलामी, ४ वर्षीय सुमित पुलामी, ६६ वर्षीय चक्र बहादुर पुलामी र १८ वर्षीया आरती पुलामी रहेका छन्।

घटनाबारे थप अनुसन्धान भइरहेको प्रहरीले जनाएको छ।