आजको मौसम: सुदूरपश्चिममा हल्का वर्षा, हिमाली क्षेत्रमा हिमपातको सम्भावना

जल तथा मौसम विज्ञान विभाग, पूर्वानुमान महाशाखाले आज देशभरको मौसम पूर्वानुमान जारी गरेको छ। हाल देशमा पश्चिमी वायुको साथै स्थानीय वायुको आंशिक प्रभाव रहेको महाशाखाले जनाएको छ।

सुदूरपश्चिम प्रदेश, कर्णाली प्रदेशलगायत देशका पहाडी भू-भागमा आंशिकदेखि साधारणतया बदली रहनुका साथै सुदूरपश्चिम प्रदेशका एक-दुई स्थानमा हल्का वर्षा भइरहेको छ। अन्य भू-भागमा आंशिक बदलीदेखि मौसम मुख्यतया सफा रहनेछ।

आज देशका पहाडी भू-भागका एक-दुई स्थानमा मेघगर्जन तथा चट्याङसहित हल्का वर्षाको सम्भावना रहेको छ भने उच्च पहाडी तथा हिमाली भू-भागका केही स्थानमा हल्का हिमपात हुनसक्ने अनुमान गरिएको छ।

विशेषगरी, सुदूरपश्चिम प्रदेश, लुम्बिनी प्रदेश तथा कर्णाली प्रदेशका पहाडी क्षेत्रमा आंशिकदेखि साधारणतया बदली रहनेछ भने कर्णाली तथा सुदूरपश्चिम प्रदेशका उच्च पहाडी र हिमाली भू-भागमा हल्का हिमपातको सम्भावना रहेको छ।

महाशाखाले मौसमको प्रभावले दैनिक जनजीवन, स्वास्थ्य, सडक तथा हवाई यातायातमा आंशिक असर पार्न सक्ने भएकाले आवश्यक सतर्कता अपनाउन आग्रह गरेको छ।