कालीकोटकी सुत्केरी महिलाको हेलिकोप्टरमार्फत उद्धार

कालीकोटकाे रासकोट नगरपालिका–६ निवासी ४० वर्षीय धने सार्कीकी श्रीमती बिस्ना सार्कीलाई हेलिकोप्टरमार्फत उद्धार गरी सुर्खेतस्थित प्रदेश अस्पतालमा पुर्‍याइएको छ। सुत्केरी हुन नसक्ने अवस्था भएपछि गाउँमै उपचार सम्भव नभएपछि स्वास्थ्यकर्मी र सरकारको पहलमा उनलाई उद्धार गरिएको हो।

 बिस्ना सार्कीको स्वास्थ्य अवस्था जटिल बन्दै गएपछि स्थानीय स्वास्थ्यकर्मीले जिल्ला प्रशासन कार्यालयसँग तत्काल सहयोगको आग्रह गरे। प्रमुख जिल्ला अधिकारी नारायणप्रसाद भट्टराईको सिफारिसपछि महिला, बालबालिका तथा ज्येष्ठ नागरिक मन्त्रालयको पहलमा हेलिकोप्टरको व्यवस्थापन गरियो।

हेलिकोप्टरको समयमै उपलब्धताले बिस्ना सार्कीको ज्यान बचाउन सफल भएको छ। उद्धारपछि धने सार्कीले सरकारले दुर्गम क्षेत्रका लागि सञ्चालन गरेको हवाई उद्धार कार्यक्रमप्रति आभार व्यक्त गर्दै यसले थुप्रै विपन्न र जोखिममा परेका महिलाको जीवन रक्षा गर्न सहयोग पुगिरहेको बताए।

धने सार्कीका अनुसार, उनले आफ्ना साना बच्चाको हेरचाह गरिरहेका छन् भने जेठी छोरीलाई आमा बिस्नाको साथमा प्रदेश अस्पताल पठाइएको छ।

सरकारद्वारा सञ्चालित हवाई उद्धार कार्यक्रमले कर्णाली र दुर्गम क्षेत्रमा स्वास्थ्य सेवा पुर्‍याउन महत्वपूर्ण योगदान दिइरहेको छ ।