नेपाल महिला क्रिकेट टोली घरेलु मैदानमा जितविहीन

नेपाल महिला क्रिकेट टोली घरेलु मैदानमा जितविहीन रह्यो। महिला टी-२०आई शृंखलाको अन्तिम खेलमा पनि नेपाल पराजित भएको छ। शुक्रवार टियु क्रिकेट मैदानमा भएको खेलमा नेपाल थाइल्यान्डसँग ७ विकेटले पराजित भएको हो। नेपालले दिएको ८२ रनको लक्ष्य थाइल्यान्डले १७ ओभरमा ३ विकेटको क्षतिमा पूरा गर्‍यो।

थाइल्यान्डका लागि कप्तान नरुएमोल चाइवाइले अविजित २७ रन बनाइन्। नन्नापाटले २३ रन र नाट्टाया बुचाथामले ११ रन बनाएका थिए। यसअघि नेपालले टस जितेर ब्याटिङ गर्दै ७ विकेटको क्षतिमा ८१ रन बनाएको थियो। नेपालका लागि सम्झाना खड्काले सर्वाधिक १७ रन बनाइन्, भने कविता जोशीले १४, इन्दु बर्माले १० र रजमती ऐरीले ११ रन बनाइन्। अन्य खेलाडी दोहोरो अंकको रन जोड्न सकेनन्।

शृंखलाको पहिलो खेलमा नेपाल नेदरल्यान्ड्ससँग २० रनले पराजित भएको थियो भने दोस्रो खेलमा थाइल्यान्डसँग ४ विकेटले पराजित भएको नेपाल तेस्रो खेलमा नेदरल्यान्ड्ससँग १५ रनले पराजित भयो। चौथो खेलमा थाइल्यान्डसँग ५ विकेटले पराजित भएको नेपाल पाँचौं खेलमा नेदरल्यान्ड्ससँग १० विकेटले पराजित भएको थियो।

खेलाडीहरूले पराजित हुनुमा फिटनेसलाई दोष दिएका छन्। उनीहरूले फिटनेस नहुँदा खेलमा पराजय व्यहोर्नुपरेको बताएका छन्।