कर्णालीका एक लाख बढी किशोरीलाई पाठेघरमा हुने क्यान्सारविरुद्धको (एचपीभी) खोप लगाइने

कर्णालीका १० जिल्लाका १ लाख २० हजार ५ सय १० जनामा पाठेघरमा हुने क्यान्सरविरुद्धको खोप लगाइने भएको छ ।
प्रदेश स्वास्थ्य निर्देशनालय सुर्खेतका अनुसार कर्णालीका १० जिल्लाका एक लाख २९ हजार किशोरीलाई पाठेघरमा हुने क्यान्सरविरुद्धको खोप लगाउन लागिएको हो । उक्त खोप अभियान आगामी २२ माघदेखि ६ फागुनसम्म सञ्चालन हुनेछ ।

महिलाहरूको पाठेघरको मुखमा हुने क्यान्सरको रोकथाम गरी मृत्युदर घटाउने उद्देश्यले खोप अभियान सञ्चालन गर्न लागिएको जनाइएको छ । विद्यालयमा अध्ययनरत कक्षा ७ देखि १० सम्मका छात्रा र विद्यालय नजाने ११ देखि १४ वर्षसम्मका किशोरीहरूलाई पाठेघरको मुखमा हुने क्यान्सरविरुद्धको एचपीभी खोप लगाउन लागिएको स्वास्थ्य सेवा निर्देशनालयका सूचना अधिकारी नवराज कँडेलले जानकारी दिए ।

खोप अभियानअन्तर्गत मुगुका चार हजार तीन सय ७९ किशोरीलाई एचपीभी खोप लगाइने छ । यस्तै, डोल्पा दुई हजार ६ सय ४१, हुम्लाका तीन हजार सात सय ३६, जुम्लाका आठ हजार आठ सय २९, कालीकोटका ११ हजार ९ सय २३, रुकुम पश्चिमका १२ हजार एक सय ६, सल्यानका १४ हजार पाँच सय १३, सुर्खेतका २८ हजार तीन सय ४०, जाजरकोटका १५ हजार पाँच सय ९२ र दैलेखका १८ हजार ९१ जना किशोरीलाई पाठेघरमा हुने क्यान्सर रोगविरुद्धको खोप लगाउन लागिएको सूचना अधिकारी कँडेलले जानकारी दिए ।
नेपाल सरकारले विश्व स्वास्थ्य संगठन (डब्लुएचओ) बाट प्रमाणित उक्त खोप १० वर्षदेखि १४ वर्ष उमेर समुहको किशोरीहरुलाई एच. पि. भीको संक्रमणबाट सुरक्षित हुन अभियान संचालन गर्न लागिएको हो ।