भेरी नदीमा डुबेर जाजरकोटका १३ वर्षीय बालकको मृत्यु

जाजरकोट । जाजरकोटमा भेरी नदीमा पौडी खेल्ने क्रममा डुबेर एक बालकको मृत्यु भएको छ।

भेरी नगरपालिका–११ मटेला निवासी अजय गिरीका अन्दाजी १३ वर्षीय छोरा अनिष गिरीको नदीमा डुबेर ज्यान गएको प्रहरीले जनाएको छ।

प्रहरीका अनुसार बुधबार दिउँसो करिब ३ः३० बजे मटेलास्थित भेरी नदीमा पौडी खेल्ने क्रममा अनिष डुबेका थिए। घटनाको जानकारी प्राप्त हुनासाथ प्रहरी चौकी मटेलाबाट प्रहरी सहायक निरीक्षक बमबहादुर थापाको नेतृत्वमा पाँच सदस्यीय प्रहरी टोली घटनास्थलमा खटिएको थियो।

स्थानीय बासिन्दा र प्रहरीको संयुक्त प्रयासमा बालकको उद्धार गरी तत्काल उपचारका लागि रुकुम पश्चिमस्थित मिसन अस्पताल चौरजहारी पठाइएको थियो। अस्पताल पुर्‍याउँदा उनको अवस्था गम्भीर रहेको बताइएको छ।

अस्पतालमा चिकित्सकले जाँच गर्ने क्रममा दिउँसो ३ः५५ बजे अनिषलाई मृत घोषणा गरेका थिए।

मृतक बालकको शव हाल मिसन अस्पताल चौरजहारीमा राखिएको छ। घटनाबारे प्रहरीले थप अनुसन्धान  भइरहेकाे जनाएको छ।