जाजरकोटमा महिलामाथि हातपात र दुर्व्यवहार गरेको आरोप रास्वपा नेता पक्राउ

जाजरकोट, जेठ १८ — जाजरकोटको कुशे गाउँपालिकामा एक महिलामाथि अपशब्द प्रयोग गर्दै हातपात तथा कुटपिट गरेको आरोपमा राष्ट्रिय स्वतन्त्र पार्टी (रास्वपा) का एक नेता पक्राउ परेका छन्।

रास्वपा जाजरकोटको कुशे गाउँपालिका सभापति मोहन विक्रम शाही उक्त आरोपमा समातिएका हुन् ।

 प्रहरीका अनुसार गत जेठ १६ गते बिहान करिब ८ बजे कुशे गाउँपालिका–६ स्थित खरढुङ्गा स्वास्थ्य चौकी भवनभित्र एक महिलामाथि अपशब्द प्रयोग गरी हातपात तथा कुटपिट गरिएको भन्ने सूचना प्राप्त भएपछि प्रहरी टोली घटनास्थलमा खटिएको थियो। अनुसन्धानका क्रममा संलग्न रहेको आरोपमा नेता शाहीलाई पक्राउ गरिएको प्रहरीले जनाएको छ।

पक्राउ परेका शाहीविरुद्ध जिल्ला प्रशासन कार्यालय जाजरकोटबाट अभद्र व्यवहार कसुर मुद्दामा सात दिनको म्याद थप अनुमति लिई थप अनुसन्धान भइरहेको जिल्ला प्रहरी कार्यालय जाजरकोटका सूचना अधिकारी प्रहरी निरीक्षक सुधिर कुमार खड्का ले जानकारी दिनुभयो।