जाजरकोटमा अपमानजनक तथा अमानवीय व्यवहार मुद्दामा फरार रहेका चन्द पक्राउ

जाजरकोट, जेठ १८ — अपमानजनक तथा अमानवीय व्यवहार मुद्दामा अदालतबाट कैद सजाय तोकिएका एक फरार प्रतिवादीलाई जाजरकोट प्रहरीले पक्राउ गरेको छ।

जिल्ला अदालत जाजरकोटको २०८० माघ २८ गतेको फैसलाअनुसार लगत नम्बर ३४२ मा २६ दिन कैद सजाय तोकिएका कुशे गाउँपालिका–५ निवासी गोविन्द बहादुर चन्दलाई प्रहरीले पक्राउ गरेको हो। फैसला पश्चात् फरार रहेका चन्दलाई खोजतलासका क्रममा नियन्त्रणमा लिइएको प्रहरीले जनाएको छ।

जिल्ला प्रहरी कार्यालय जाजरकोटबाट खटिएको विशेष प्रहरी टोलीले आइतबार बिहान करिब ७:३० बजे उनलाई पक्राउ गरेको हो।

पक्राउ परेका चन्दलाई आवश्यक कानुनी प्रक्रिया पूरा गरी सोही दिन जिल्ला अदालत जाजरकोटमा उपस्थित गराइएको थियो। अदालतको आदेशअनुसार कैद सजाय भुक्तानका लागि उनलाई कारागार कार्यालय जाजरकोट पठाइएको जिल्ला प्रहरी कार्यालय जाजरकोटका सूचना अधिकारी तथा प्रहरी निरीक्षक सुधिर कुमार खड्का ले जानकारी दिनुभयो।