खालिपेट लसुन खानु स्वास्थ्यका लागि कतिको फाइदाजनक ?

 काठमाडौं — बिहान खाली पेटमा लसुन सेवन गर्नु स्वास्थ्यका लागि फाइदाजनक मानिए पनि यसको प्रयोग गर्दा सावधानी अपनाउनुपर्ने विज्ञहरूले बताएका छन्।

परम्परागत रूपमा घरेलु उपचारमा प्रयोग हुँदै आएको लसुनलाई औषधीय गुणयुक्त खाद्य पदार्थका रूपमा लिइन्छ। विशेषगरी पेट दुख्दा मनतातो पानीसँग लसुन सेवन गर्ने चलन रहँदै आएको छ। प्राचीन समयदेखि नै लसुनले शरीरलाई बलियो बनाउने, ऊर्जा दिने र समग्र स्वास्थ्य सुधार गर्ने विश्वास गरिँदै आएको पाइन्छ।

स्वास्थ्य विज्ञहरूका अनुसार लसुनमा एन्टिबायोटिक तथा एन्टिअक्सिडेन्ट गुण हुन्छ। यसमा भिटामिन ए, बी र सीका साथै आयोडिन, आइरन, पोटासियम, क्याल्सियम र म्याग्नेसियमजस्ता खनिज तत्व पाइन्छन्। नियमित सेवनले रगतमा कोलेस्टेरोलको मात्रा घटाउन, रक्तसञ्चार सुधार गर्न र मुटुसम्बन्धी रोगको जोखिम कम गर्न सहयोग पुर्‍याउने बताइएको छ।

त्यसैगरी, लसुनले पाचन प्रणाली सुधार गर्ने, कब्जियत र डायरियाजस्ता समस्यामा राहत दिने तथा रोग प्रतिरोधात्मक क्षमता बढाउने काम गर्छ। दम, खोकी तथा जोर्नी दुखाइमा समेत यसको उपयोगी प्रभाव देखिएको चिकित्सकहरू बताउँछन्।

यद्यपि, लसुनको अत्यधिक वा असावधानीपूर्वक सेवनले केही समस्या निम्त्याउन सक्छ। दैनिक धेरै मात्रामा सेवन गर्दा मुख गन्हाउने, पेट पोल्ने, ग्यास बढ्ने तथा छाती जल्ने जस्ता समस्या देखिन सक्छन्।

विशेषगरी ग्यास्ट्रिक वा एसिडिटी भएका, लसुनप्रति एलर्जी हुने तथा रगत पातलो बनाउने औषधि सेवन गरिरहेका व्यक्तिले लसुन सेवन नगर्न सुझाव दिइएको छ। साथै केही मुटु तथा श्वासप्रश्वाससम्बन्धी बिरामीले पनि चिकित्सकको सल्लाहबिना लसुन सेवन नगर्नु उपयुक्त हुन्छ।

तसर्थ, लसुनमा धेरै स्वास्थ्य लाभ भए पनि व्यक्तिगत स्वास्थ्य अवस्था अनुसार सन्तुलित रूपमा सेवन गर्नु आवश्यक रहेको विज्ञहरूको भनाइ छ।