आइसिसी च्यालेन्ज ट्रफीमा नेपालको लगातार दोस्रो जित

रुवाण्डामा जारी आइसिसी महिला च्यालेन्ज ट्रफी २०२६ अन्तर्गत नेपालले लगातार दोस्रो जित दर्ता गरेको छ। नेपालले घरेलु टोली रुवाण्डालाई २ विकेटले पराजित गर्दै प्रतियोगितामा आफ्नो लय कायम राखेको हो।

रुवाण्डाले दिएको ८९ रनको लक्ष्य नेपालले १९.४ ओभरमा ८ विकेट गुमाउँदै पूरा गर्यो। नेपालको जितमा सम्झना खड्काले ४२ रनको महत्वपूर्ण योगदान दिइन्।

यसअघि पहिलो खेलमा अमेरिकासँग ४४ रनले पराजित भएको नेपालले दोस्रो खेलमा इटालीलाई ५० रनले हराएको थियो। उक्त जितसँगै नेपालले प्रतियोगितामा लगातार दोस्रो सफलता हासिल गरेको हो।

खेलमा टस जितेर पहिले ब्याटिङ गरेको रुवाण्डा १९.४ ओभरमा ८८ रनमा अलआउट भयो। उसका लागि एलिस इकुज्वेले १७, मर्भिले उवासेले १५, क्लारिस उवासेले १३ तथा रोजिन इरेराले अविजित १३ रन बनाइन्।

नेपालका तर्फबाट बलिङमा रचना चौधरीले ३ विकेट लिइन् भने पूजा महतोले २ विकेट हात पारिन्। साथै कविता कुँवर, मनिषा उपाध्याय र रिया शर्माले समान १/१ विकेट लिए।