सुर्खेतकाे बराहतालमा अवैध सालको काठ बरामद 

सुर्खेत, ८ वैशाख — सुर्खेतको बराहताल गाउँपालिका–५ धुलेचौरमा प्रहरीले वन कार्यालयसँगको संयुक्त प्रयासमा अवैध सालको काठ बरामद गरेको छ।

मंगलबार अपराह्न करिब ४:४५ बजे स्थानीय ५५ वर्षीय कर्णबहादुर थापाको गोठमा अवैध काठ लुकाइराखिएको भन्ने गोप्य सूचनाका आधारमा छापा मारिएको प्रहरीले जनाएकाे छ। उक्त प्रयासमा इलाका प्रहरी कार्यालय बाबियाचौर र सव-डिभिजन वन कार्यालय बड्डिचौरको संयुक्त टोली खटिएको थियो।

प्रहरी निरीक्षक भुपेन्द्र शाही र प्रहरी सहायक निरीक्षक होबिन्द बहादुर रावलको नेतृत्वमा पुगेको टोलीले गोठ खानतलासी गर्दा लुकाइराखिएको अवस्थामा ७ फिट लम्बाइका २२ थान सालका चिरान काठ फेला पारेको जनाएको छ।

बरामद काठ आवश्यक कानुनी प्रक्रिया पूरा गरी सव-डिभिजन वन कार्यालय बड्डिचौरको जिम्मा लगाइएको छ।

घटनापछि गोठधनी कर्णबहादुर थापा भने फरार रहेकाे प्रहरीले जनाएकाे छ। उनको खोजी कार्य तीव्र पारिएको प्रहरीले जनाएको छ। घटनाबारे थप अनुसन्धान तथा कानुनी कारबाहीका लागि मुद्दा डिभिजन वन कार्यालय सुर्खेतमा पठाइएको छ।