चौकुने गाउँपालिका वडा नं. १ मा टावर निर्माणका लागि BTS सर्भे शुरु , सञ्चार सेवा विस्तार हुने संकेत

सुर्खेत। चौकुने गाउँपालिका वडा नं. १ मा लामो समयदेखि टेलिफोन तथा सञ्चार सेवाको पहुँचबाट टाढा रहेका बस्तीहरूमा अब सञ्चार सेवा विस्तार हुने भएको छ। नेपाल टेलिकमले उक्त क्षेत्रमा BTS टावर निर्माणका लागि पुनः स्थलगत सर्भे कार्य सम्पन्न गरेको छ। २०८२ साल जेठ महिनामा यसअघि प्राविधिक कारणले स्थगित भएको टावर निर्माण कार्यलाई पुनः अघि बढाउने उद्देश्यसहित नेपाल टेलिकमको प्राविधिक टोलीले विस्तृत अध्ययन तथा सर्भे गरेको हो। सर्भे कार्यमार्फत आवश्यक प्राविधिक सम्भाव्यता, भौगोलिक अवस्था तथा संरचना निर्माणका लागि उपयुक्त स्थानको पहिचान गरिएको बताइएको छ।

सर्भे कार्यका लागि नेपाल टेलिकम सुर्खेतबाट आउनुभएका इन्जिनियर बिरेन्द्र केसी तथा सहायक प्राविधिक अधिकृत प्रेम बहादुर रोकाया को टोली खटिएको थियो। उहाँहरूले स्थलगत रूपमा विभिन्न प्राविधिक पक्षहरूको अध्ययन गरी आवश्यक प्रतिवेदन तयार पार्ने कार्य गरेका छन्। स्थानीयवासीहरूले लामो समयदेखि सञ्चार सेवाबाट वञ्चित रहँदै आएको अवस्थामा अब टावर निर्माण प्रक्रिया अघि बढ्नु खुसीको विषय भएको बताएका छन्। यस कार्यले शिक्षा, स्वास्थ्य, आपतकालीन सेवा तथा दैनिक सञ्चारमा ठूलो सहजता ल्याउने विश्वास गरिएको छ। उक्त टावर निर्माण कार्यलाई छिटो र प्रभावकारी रूपमा अघि बढाउन माननीय रमेश सापकोटा को महत्वपूर्ण समन्वय तथा पहल रहने अपेक्षा गरिएको छ।

स्थानीय तह, नेपाल टेलिकम तथा सरोकारवाला निकायहरूबीचको सहकार्यमा परियोजना छिट्टै सम्पन्न गर्ने लक्ष्य लिइएको छ। टावर निर्माण सम्पन्न भएपछि चौकुने गाउँपालिका वडा नं. १ का दुर्गम बस्तीहरूमा गुणस्तरीय टेलिफोन तथा इन्टरनेट सेवा विस्तार भई डिजिटल पहुँचमा ठूलो सुधार आउने वड न १ का वडा अध्यक्ष जिरक बडुवालले बताउनुभएको छ ।