सङ्घीयता कार्यान्वयनमा केन्द्रको ‘केन्द्रीकृत मानसिकता’ बाधक : मुख्यमन्त्री कँडेल

कर्णाली प्रदेशका मुख्यमन्त्री यामलाल कँडेलले सङ्घीय सरकारको परम्परागत र केन्द्रीकृत मानसिकताका कारण सङ्घीयताको प्रभावकारी कार्यान्वयनमा गम्भीर चुनौती देखिएको बताएका छन्। शनिबार कर्णाली प्रदेश मुख्य न्यायाधिवक्ताको कार्यालयको आठौँ स्थापना दिवसलाई सम्बोधन गर्दै उनले संविधान जारी भएको एक दशक बितिसक्दा पनि जनचाहनाअनुसार प्रदेश र स्थानीय तहले आफ्नो संवैधानिक अधिकार प्रयोग गर्न नपाएको गुनासो गरे। केन्द्रको संकुचित सोचले तल्लो तहका सरकार सञ्चालनमा विभिन्न व्यावहारिक र कानुनी जटिलता पैदा गरेको उल्लेख गर्दै मुख्यमन्त्री कँडेलले सङ्घीयतालाई सफल बनाउन अधिकारको वास्तविक विकेन्द्रीकरण हुनुपर्नेमा जोड दिए।