सुर्खेतमा ब्राउन सुगरसहित वली पक्राउ

वीरेन्द्रनगर, १९ चैत । सुर्खेतको वीरेन्द्रनगरबाट प्रहरीले लागूऔषध ब्राउन सुगरसहित एक जनालाई नियन्त्रणमा लिएको छ। वीरेन्द्रनगर नगरपालिका वडा नम्बर ११, गणेशपुर टोल बस्ने २८ वर्षीय विजय वलीलाई प्रहरीले उनकै घरबाट पक्राउ गरेको हो।

बिहीबार दिउँसो करिब २:३० बजेको समयमा आफ्नै घरमा शंकास्पद रूपमा बसिरहेको अवस्थामा कर्णाली प्रदेश प्रहरी कार्यालय, जिल्ला प्रहरी कार्यालय सुर्खेत र लागूऔषध नियन्त्रण ब्यूरोको संयुक्त टोलीले उनलाई फेला पारेको थियो। वलीमाथि शंका लागेर चेकजाँच गर्दा उनको साथबाट लागूऔषध ब्राउन सुगर जस्तो देखिने खैरो धुलो पदार्थ बरामद भएको प्रहरीले जनाएको छ।

प्रहरीका अनुसार उनको साथबाट दुईवटा ठूला पुडिया र चारवटा साना पुडिया गरी जम्मा ६ पुडिया लागूऔषध फेला परेको छ। बरामद गरिएको उक्त पदार्थको तौल करिब २ ग्राम रहेको छ। लागूऔषधसहित नियन्त्रणमा लिइएका वलीलाई थप अनुसन्धानका लागि जिल्ला प्रहरी कार्यालय सुर्खेतमा राखिएको छ र घटनाको बारेमा विस्तृत अनुसन्धान भइरहेको छ।