अध्यक्ष ओलीको रिहाइको माग गर्दै एमालेद्वारा देशभर ज्ञापन पत्र बुझाइँदै

काठमाडौं । नेपाल कम्युनिष्ट पार्टी (एमाले) ले आफ्ना अध्यक्ष केपी शर्मा ओली को रिहाइको माग गर्दै आज देशभरका ७७ वटै जिल्ला प्रशासन कार्यालयमा ज्ञापन पत्र बुझाउने भएको छ।

गौरीबहादुर कार्की आयोगले दोषी ठहर गरेको आधारमा अध्यक्ष ओलीलाई हिजो निवासबाट प्रहरीले पक्राउ गरेपछि एमाले सचिवालय बैठकले विरोध जनाउँदै रिहाइको मागसहित देशव्यापी रूपमा ज्ञापन पत्र बुझाउने निर्णय गरेको हो।

पार्टीका प्रचार तथा प्रकाशन विभाग संयोजक मीनबहादुर शाहीका अनुसार काठमाडौंमा माइतीघर मण्डला मा भेला भई नारा जुलुससहित जिल्ला प्रशासन कार्यालयमा पुगेर ज्ञापन पत्र बुझाइने कार्यक्रम तय गरिएको छ।

यसअघि हिजो पनि पार्टी निकट जनसंगठनहरूले माइतीघरदेखि बानेश्वरसम्म विरोध प्रदर्शन गरेका थिए।

यसैबीच अध्यक्ष ओली पक्राउ प्रकरणबारे आज बिहान १०ः३० बजे कानुनविद्हरूसँग अन्तरक्रिया कार्यक्रमसमेत आयोजना गरिने भएको छ। कार्यक्रम पुतलीसडक स्थित संगठनको केन्द्रीय कार्यालयमा हुने बताइएको छ।