वैदेशिक रोजगारीका लागि स्वास्थ्य परीक्षण अब जुनसुकै मान्यता प्राप्त अस्पतालमा

काठमाडौं | वैदेशिक रोजगारीमा जाने कामदारले अब सरकारी मान्यता प्राप्त जुनसुकै अस्पतालबाट स्वास्थ्य परीक्षण गर्न पाउने भएका छन्। श्रम, रोजगार तथा सामाजिक सुरक्षा मन्त्रालय ले यससम्बन्धी नयाँ व्यवस्था लागू गर्ने निर्णय गरेको हो।

मन्त्री दिपककुमार साह को नेतृत्वमा बसेको मन्त्रिस्तरीय बैठकले स्वास्थ्य परीक्षणका लागि इच्छुक स्वास्थ्य संस्थाहरूको सूचीकरण खुला गर्ने निर्णय समेत गरेको छ। साथै, “स्वास्थ्य संस्था सूचीकरण, नवीकरण तथा अनुगमनसम्बन्धी कार्यविधि, २०७२” को दफा ३ अनुसार आवश्यक प्रक्रिया अघि बढाइने जनाइएको छ।

यसअघि सीमित स्वास्थ्य संस्थामार्फत मात्र परीक्षण हुँदै आएकोमा अब दायरा विस्तार गरिँदा सेवामा सहजता आउने अपेक्षा गरिएको छ। मन्त्रालयका अनुसार हालसम्म १९४ स्वास्थ्य संस्थाले नवीकरण गरी वैदेशिक रोजगारीमा जाने श्रमिकको स्वास्थ्य परीक्षण गर्दै आएका छन्।

यता, नेपाल मेडिकल व्यवसायी सङ्घ का महासचिव कृष्णप्रसाद बजगाईं ले कार्यविधि कार्यान्वयन सकारात्मक भए पनि निजी क्षेत्रका स्वास्थ्य संस्था र व्यवसायीको उचित व्यवस्थापन आवश्यक रहेको बताएका छन्।

सरकारको यो निर्णयले वैदेशिक रोजगारीमा जाने श्रमिकलाई स्वास्थ्य परीक्षणमा थप सहजता र पहुँच विस्तार हुने अपेक्षा गरिएको छ।