स्याउमा पाइने भिटामिनले स्वास्थ्यमा ल्याउँछ चमत्कारिक लाभ

असाेज ७। स्वादिष्ट मात्र नभई पोषणयुक्त फलको रूपमा परिचित स्याउ स्वास्थ्यका लागि बहुउपयोगी मानिन्छ । पोषणविद्हरूका अनुसार स्याउमा पाइने भिटामिन र एन्टिअक्सिडेन्टले रोग प्रतिरोधात्मक क्षमता बढाउनुका साथै मुटु, मधुमेह र तौल नियन्त्रणमा सकारात्मक प्रभाव पार्छ ।

विशेषज्ञका अनुसार स्याउमा भिटामिन सी उच्च मात्रामा पाइन्छ, जसले शरीरको इम्युन प्रणालीलाई बलियो बनाउँछ । साथै, यसमा भिटामिन ए, ई, के र बी–कम्प्लेक्सजस्ता महत्वपूर्ण भिटामिनहरू पनि पर्याप्त मात्रामा पाइने भएकाले स्वास्थ्यलाई सन्तुलित राख्न मद्दत पुर्‍याउँछ ।

स्याउमा प्रशस्त फाइबर र एन्टिअक्सिडेन्ट हुने भएकाले मुटुको स्वास्थ्यका लागि फाइदाजनक मानिन्छ । यसको नियमित सेवनले खराब कोलेस्ट्रोल घटाउने र राम्रो कोलेस्ट्रोल बढाउने काम गर्ने वैज्ञानिक प्रमाणहरू छन् ।

त्यस्तै, स्याउ कम क्यालोरीयुक्त भए पनि उच्च फाइबरयुक्त फल भएकाले तौल घटाउने प्रयत्नमा रहेका व्यक्तिका लागि उपयोगी हुन्छ । लामो समय पेट भरिएको महसुस गराउने गुणले अनावश्यक खाना सेवनमा कमी ल्याउँछ । यसमा रहेका पोलिफेनोल र एन्टिअक्सिडेन्टले टाइप–२ मधुमेहको जोखिम समेत घटाउने देखिएको छ ।

बजारमा उपलब्ध स्याउका प्रकारअनुसार पोषणतत्वमा पनि भिन्नता पाइन्छ । हरियो स्याउमा बढी फाइबर र कम चिनी हुन्छ भने रातो स्याउ एन्टिअक्सिडेन्टले भरिपूर्ण हुन्छ, जुन मुटुको स्वास्थ्यका लागि उपयोगी हुन्छ । त्यस्तै, पहेंलो स्याउमा विभिन्न पोषक तत्वहरू पाइने भएकाले पोषणविद्हरूले आहारमा सबै प्रकारका स्याउ समावेश गर्न सुझाव दिएका छन् ।

विशेषज्ञहरू भन्छन्, “दैनिक एउटा स्याउ सेवनले शरीरलाई आवश्यक भिटामिन र खनिज पूर्ति गर्नाका साथै थुप्रै रोगहरूको जोखिम घटाउन सहयोग पुर्‍याउँछ ।”