तौल घटाउन जान्नै पर्ने २१ उपाय

असाेज ६ – तौल घटाउने कुरा धेरैका लागि चुनौतीपूर्ण विषय बनेको छ। तर, वैज्ञानिक अध्ययन र विशेषज्ञहरूको सल्लाहअनुसार दैनिक जीवनशैलीमा केही सरल तरिकाहरू अपनाउन सक्दा तौल नियन्त्रणमा राख्न र क्रमशः घटाउन सकिन्छ।

सबैभन्दा पहिला धैर्य गर्नुपर्छ। तौल एकैदिन वा केही हप्तामै घट्दैन, बरु दीर्घकालीन जीवनशैलीकै परिणाम हो। त्यसैले निरन्तरता र विश्वास जरुरी हुन्छ। आफूले गरेको प्रयासमा भरोसा राख्ने मानिसले नै सफलता पाउँछन् भन्ने विज्ञहरूको भनाइ छ।

नाश्तापछि दिनभर पानीलाई मुख्य पेय बनाउनुपर्ने, कोल्ड ड्रिंक वा चिया–कफी कम गर्नुपर्ने सल्लाह दिइन्छ। खानामा क्यालोरीको हिसाब गर्दा प्रायः मानिसले गलत अनुमान गर्ने भएकाले अनुमानित क्यालोरीमा १० प्रतिशत थपेर ध्यान दिनुपर्छ। ठूलो परिकारभन्दा सानो–सानो मात्रामा दिनमा चारदेखि पाँच पटक खानु उपयुक्त मानिन्छ।

नियमित हिँडाइलाई पनि महत्व दिनुपर्छ। तौल स्थिर राख्न ३० मिनेट पर्याप्त भए पनि घटाउन चाहनेहरूले कम्तीमा ४५ मिनेट बिहानै स्वच्छ हावामा पैदल हिँड्नुपर्ने हुन्छ। रोचक कुरा के छ भने निलो रंगले भोक कम गर्ने भएकाले निलो प्लेट वा टेबलक्लोथ प्रयोग गर्न सुझाइन्छ।

तौल घटाइसकेपछि पूराना कपडा दान गर्नु पनि एक उपाय हो। यसले फेरि बढेमा नयाँ कपडा किन्नुपर्ने बाध्यताले अनुशासित रहन प्रेरित गर्छ। खाना सानो थालमा लिनु, ऐनाअगाडि खानु, पानी धेरै भएको तरकारी प्रयोग गर्नु, कम चिल्लो दूध पिउनु जस्ता सानातिना उपायहरूले पनि ठूलो फरक पार्छन्।

सकेसम्म घरमै खाना खानु बुद्धिमानी ठहरिन्छ, किनभने बाहिरका परिकारमा बढी तेल र क्यालोरी हुन्छ। खानाको शैलीमा ढिलोपन ल्याउनुपर्छ, जसले दिमागलाई पेट भरिएको संकेत समयमै दिन्छ। जुसको सट्टा फल खानु अझै राम्रो हुन्छ।

यस्तै, दैनिक जीवनमा बढी हिँड्ने बानी बसाल्न सकिन्छ। लिफ्टको सट्टा सिढी, छोटो दूरीमा पैदल, वा घरमा सजिलो श्रम गर्नुले क्यालोरी खर्च हुन्छ। हप्तामा कम्तीमा एकपटक शारीरिक मेहनत हुने काम, साँझमा हल्का मात्र खाने अभ्यास, खाली समयमा नाच्ने बानी, बिहान मनतातो पानीमा कागती र मह मिसाएर खाने, तथा दिउँसो खाना खानुअघि तीन गिलास पानी पिउने जस्ता उपायहरूले तौल नियन्त्रणमा राख्न मद्दत गर्छन्।

विशेषज्ञहरूका अनुसार यी बानीलाई जीवनशैलीमै उतार्न सके दीर्घकालीन रूपमा तौल घटाउन मात्र होइन, स्वस्थ जीवन जिउन सकिन्छ।