बिहान खालि पेटमा के खाने, के नखाने ?

बिहान उठ्नेबित्तिकै खानपिनमा विशेष ध्यान दिनु पर्ने चिकित्सकहरू बताउँछन् । दिनको सबैभन्दा महत्वपूर्ण आहार मानिने नास्ता स्वास्थ्यका दृष्टिले पौष्टिक र हल्का हुन आवश्यक हुन्छ । तर, धेरै मानिसमा बिहान उठ्नेबित्तिकै चिया वा कफी पिउने बानी बस्छ, जुन स्वास्थ्यका लागि राम्रो मानिँदैन । खाली पेटमा चिया वा कफी सेवन गर्दा पेटमा ग्यास जम्ने, अपच हुने र दीर्घकालमा ग्यास्ट्रिक वा अल्सरको समस्या देखिने सम्भावना हुन्छ । त्यसैले बिहान उठ्नेबित्तिकै पानी पिउनु वा फलफूलको रस सेवन गर्नु उपयुक्त मानिन्छ ।

यस्तै, बिहान खाली पेटमा चिल्लोमा पकाइएको खाना, मसालेदार परिकार वा तेलमा तारेको परिकार सेवन गर्नु पनि स्वास्थ्यका लागि हानिकारक हुन्छ । यस्तो बानीले सुरुमा सामान्य ग्यास्ट्रिकको समस्या देखाए पनि पछि यो दीर्घरोगमा परिणत हुने जोखिम हुन्छ ।

विशेषज्ञका अनुसार खाली पेटमा केरा खानु पनि स्वास्थ्यका लागि राम्रो हुँदैन । केरामा म्याग्नेसियमको मात्रा बढी हुने भएकाले बिहान सेवन गर्दा रगतमा म्याग्नेसियमको मात्रा असन्तुलित भई मुटुमा नकारात्मक असर पर्न सक्छ । त्यस्तै, बिहानै गुलियो पदार्थ सेवन गर्दा शरीरमा इन्सुलिनको मात्रा अचानक बढ्छ, जसले प्यान्क्रियाजमा दबाब सिर्जना गर्ने र दीर्घकालमा मधुमेहको सम्भावना बढाउने गर्दछ ।

खाली पेटमा टमाटर खाने बानी पनि हानिकारक हुन्छ । टमाटरमा रहेको ‘टैनिक एसिड’का कारण पेटमा एसिडिटी बढ्ने र ग्यास्ट्रिक–अल्सरको खतरा रहने चिकित्सकको सुझाव छ । कतिपयले बिहानै उठ्नेबित्तिकै कोल्ड ड्रिङ्क्स पिउने गर्छन्, तर यसले पाचन प्रणालीलाई क्षति पुर्याउनुका साथै म्यूकस मेम्ब्रेनमा नकारात्मक असर पुर्याउँछ । त्यस्तै, दहीलाई सामान्यतया स्वास्थ्यकर मानिए पनि खाली पेटमा यसको सेवन गर्दा पेटमा हाइड्रोक्लोरिक एसिड बढ्ने र ‘हेल्दी ब्याक्टेरिया’ कमजोर हुने बताइन्छ ।

तर, बिहान खाली पेटमा अण्डा, ओटमिल, ब्राउन ब्रेड, खरबुजा, ब्लूबेरी, मह वा कार्बोहाइड्रेटयुक्त खाना सेवन गर्नु स्वास्थ्यका लागि लाभदायी हुन्छ । यी खानेकुराले पेटलाई असहज नबनाई पाचन प्रणालीलाई सहज राख्ने भएकाले बिहान नास्ता हल्का, पौष्टिक र सन्तुलित बनाउन सकिन्छ ।