कर्णालीमा विद्यार्थीमाझ लोक सेवा आयोग कार्यक्रम सुरु

वीरेन्द्रनगर । लोक सेवा आयोगले आफ्नो हीरक जयन्ती वर्ष २०८२ तथा ७५ औं वार्षिकोत्सवको अवसरमा कर्णालीमा विद्यार्थीमाझ कार्यक्रम सुरु गरेको छ। बुधबार वीरेन्द्रनगरमा आयोजित कार्यशालामा आयोगका अध्यक्ष माधवप्रसाद रेग्मी र सदस्य दिनेश सिलवालको उपस्थितिमा कार्यक्रमको सुरुवात गरिएको हो।

आयोगका अनुसार यो कार्यक्रम प्रदेश राजधानीदेखि जिल्ला, पालिका हुँदै वडासम्म पुर्‍याइनेछ। सहसचिव पुरुषोत्तम शर्माले आयोगको कार्यप्रणाली र सिद्धान्तबारे विद्यार्थी तथा सरोकारवालालाई जानकारी दिने उद्देश्यले देशका सातै प्रदेशमा कार्यक्रम आयोजना गरिएको जानकारी दिए।

कर्णालीका १० वटै जिल्लास्थित सदरमुकामका पालिकाबाट विद्यार्थी सहभागी गराइएको छ। साथै मध्यपश्चिम विश्वविद्यालय र प्राविधिक शिक्षातर्फका विद्यार्थीहरूको पनि सहभागिता रहेको छ। सहभागीलाई आयोगको “नवोदित मित्र” का रूपमा स्वागत गरिने र उनीहरूलाई विद्यालय तथा साथीहरूलाई पनि आयोगबारे जानकारी दिन प्रेरित गरिने बताइएको छ।

आयोगका अध्यक्ष रेग्मीले निष्पक्ष छवि बनाएको आयोगमा युवापुस्ताले जोडिनुपर्ने धारणा राख्दै मिहिनेत र क्षमताले सरकारी सेवामा प्रवेश सहज हुने उल्लेख गरे। सुर्खेत कार्यालय प्रमुख रुद्रबहादुर कार्कीले युवालाई सार्वजनिक सेवाप्रति आकर्षित गर्ने र उत्कृष्ट कर्मचारी छनोट सुनिश्चित गर्ने योजनाअनुसार कार्यक्रम सुरु गरिएको बताए।

१६ देखि २७ भदौसम्म सबै प्रदेशमा यस्तै कार्यक्रम सञ्चालन हुने आयोगले जनाएको छ।