के पातलो मान्छे साँच्चै स्वास्थ्य हुन्छन त ?

काठमाडौँ – प्रायः मानिसहरू पातलो हुनु स्वास्थ्यको चिन्ह हो भन्ने भ्रममा पर्छन्। तर स्वास्थ्य विज्ञहरूका अनुसार शरीरको तौल वा बाहिरी आकार मात्रले स्वास्थ्य नाप्न सकिँदैन।

फिटनेस विशेषज्ञहरू भन्छन्, कतिपय पातला देखिने व्यक्तिहरूमा ऊर्जा स्तर कम, रोग प्रतिरोधात्मक क्षमता कमजोर र शरीरभित्र बोसो बढी हुने अवस्था हुन्छ, जसलाई ‘स्किनी फ्याट’ भनिन्छ। यस्तो अवस्थामा मेटाबोलिक स्वास्थ्य बिग्रने खतरा रहन्छ।

स्वस्थ हुनुका प्रमुख पहिचानहरूमा सामान्य रक्तचाप र चिनीको स्तर, सक्रिय ऊर्जा, बलियो प्रतिरोधात्मक क्षमता, सन्तुलित मानसिक स्वास्थ्य र पौष्टिक आहारलाई मानिन्छ।

यद्यपि पेट वरिपरि बोसो बढी जम्दा हृदय रोग, मधुमेह र उच्च रक्तचापको जोखिम बढ्ने भएकाले तौल र कम्मर–हिप अनुपातमा ध्यान दिनुपर्ने विज्ञहरूको सुझाव छ।

वास्तविक स्वास्थ्य भनेको सन्तुलित शरीर, नियमित व्यायाम, पर्याप्त निद्रा र पोषिलो आहारमा आधारित जीवनशैली हो। त्यसैले पातलो हुनु मात्र स्वास्थ्यको प्रमाण होइन, सक्रिय र सन्तुलित जीवनशैली नै फिटनेसको आधार हो।