गृह मन्त्रालयद्वारा हालसम्मकै सबैभन्दा बढी बेरुजु फर्स्योट

गृह मन्त्रालयले आर्थिक वर्ष २०८१/८२ मा हालसम्मकै सबैभन्दा ठूलो परिमाणको बेरुजु फर्स्योट गर्न सफल भएको छ । मन्त्रालयले एकै वर्षमा २ अर्ब ३६ करोड १२ लाख ६३ हजार रुपैयाँ बेरुजु फर्स्योट गरी वित्तीय सुशासनमा उल्लेखनीय प्रगति हासिल गरेको हो। अघिल्लो वर्षसम्म कुल ३ अर्ब ७२ करोड ४५ लाख ८७ हजार रुपैयाँ बेरुजु बाँकी रहेकोमा गत वर्ष ६३.१७ प्रतिशत रकम फर्स्योट भएपछि अब मन्त्रालयको कुल बेरुजु १ अर्ब ४७ करोड ४५ लाख रुपैयाँमा झरेको छ ।

गृह मन्त्रालयको आर्थिक प्रशासन शाखाका प्रमुख उपसचिव खड्गानन्द अधिकारीका अनुसार, गृहमन्त्री रमेश लेखकको निर्देशन, गृहसचिवको समन्वय तथा मातहत निकायहरूको सक्रियताले यो सफलता सम्भव भएको हो । आर्थिक वर्ष २०७८/७९ मा १.४१ प्रतिशत रहेको बेरुजु दर घट्दै २०८१/८२ मा ०.०९ प्रतिशतमा सीमित भएको मन्त्रालयले जनाएको छ । बेरुजु फर्स्योटलाई प्रभावकारी बनाउन मन्त्रालयले आन्तरिक व्यवस्थापन महाशाखा प्रमुखको संयोजकत्वमा समिति गठन गरी नियमित समीक्षा र ताकेता गर्दै आएको छ।