कर्णालीवासीले सधैँ सम्झिने दिन भदौ ४ : मुख्यमन्त्री कँडेल

सुर्खेत — कर्णाली प्रदेशका मुख्यमन्त्री यामलाल कँडेलले भदौ ४ गतेलाई कर्णालीवासीले सधैँभरि सम्झिने दिनको रूपमा लिने बताएका छन्।

कर्णाली प्रदेश स्थापना दिवसको अवसर पारेर सोमबार सुर्खेत उद्योग वाणिज्य सङ्घको आयोजनामा भएको वृहत सरसफाइ कार्यक्रममा सम्बोधन गर्दै मुख्यमन्त्री कँडेलले प्रदेश सरकारले स्थापना दिवस केवल एक दिन मात्र नभई तीन दिनसम्म विभिन्न कार्यक्रम गरी उत्सवको रूपमा मनाउने निर्णय गरेको जानकारी दिए।

सरसफाइलाई जीवनसँग प्रत्यक्ष सम्बन्धित बताउँदै उनले जनचेतना अभिवृद्धि गर्न सबैको सक्रियता आवश्यक रहेको उल्लेख गरे। उनले भने, “आफ्नो घरअगाडिको आँगन सफा राखेमा बाहिरबाट आउने पनि खुशी हुन्छन्। फोहोरका कारण लाग्न सक्ने रोग पनि लाग्दैन। घरभित्रको फोहोर सडकमा थुपार्ने काम राम्रो होइन, त्यसलाई व्यवस्थित तरिकाले सङ्कलन गरेर तोकिएको स्थानमै फाल्नुपर्छ।”

उनका अनुसार शहरलाई सफा राख्न सके वातावरण स्वस्थ हुने र त्यसले मानिसको जीवन पनि स्वस्थ राख्नेछ।

कार्यक्रममा सुरक्षा निकायका प्रमुख एवम् प्रतिनिधि, वीरेन्द्रनगर नगरपालिकाका उपप्रमुख निलकण्ठ खनाल, उद्योग वाणिज्य सङ्घ सुर्खेतका अध्यक्ष हर्ष विक्रम खड्का लगायत सरोकारवालाको सहभागिता रहेको थियो।