कर्णाली प्रदेशमा भदौ ४ गते सार्वजनिक बिदा

सुर्खेत – कर्णाली प्रदेश सरकारले ‘प्रदेश स्थापना तथा सहिद दिवस’को अवसरमा भोलि, भदौ ४ गते बुधबार, प्रदेशभर सार्वजनिक बिदा दिने घोषणा गरेको छ।

प्रदेशको आन्तरिक मामिला तथा कानून मन्त्रालयले एक सूचना जारी गर्दै प्रदेशभरका सबै सरकारी कार्यालय तथा सार्वजनिक संघ-संस्थाहरुमा बिदा दिने निर्णय भएको जानकारी गराएको हो। प्रदेश स्थापना र सहिदहरूको सम्झनामा हरेक वर्ष भदौ ४ गतेलाई विशेष दिनका रूपमा मनाइँदै आएको छ।

मन्त्रालयका प्रवक्ता एवं उपसचिव उत्तम गौतमद्वारा जारी सूचनामा २०८१ साल चैत १७ गते बसेको प्रदेश मन्त्रिपरिषद्को बैठकले गरेको निर्णयअनुसार बिदा दिइएको उल्लेख छ। यो निर्णयसँगै प्रदेशका सम्पूर्ण सरकारी कामकाज तथा सेवाहरू भोलि एक दिनका लागि बन्द रहनेछन्।

कर्णाली प्रदेशले प्रदेश स्थापना दिवस तथा सहिद दिवसका अवसरमा विभिन्न कार्यक्रमहरू आयोजना गर्दै आएको छ। यो दिनलाई प्रदेशको पहिचान र स्वायत्तताको प्रतीकका रूपमा लिइन्छ।