नागरिकता विधेयकमा दफावार छलफल अघि बढ्दै

राष्ट्रिय सभाअन्तर्गतको विधायन व्यवस्थापन समितिले नेपाल नागरिकता (दोस्रो संशोधन) विधेयकमाथि दफावार छलफल अघि बढाएको छ। गृहमन्त्री रमेश लेखकले १५ माघ २०८१ मा ल्याएको विधेयक १४ असार २०८२ मा प्रतिनिधि सभाबाट पारित भई राष्ट्रिय सभामा पुगेको हो।

प्रस्तावित संशोधनमा आमाको नाम मात्रबाट पनि नागरिकता पाउने प्रावधान समावेश गरिएको छ। साथै, बाबुको नाम, थर र ठेगाना उल्लेख गर्न नचाहेमा नागरिकताको प्रमाणपत्रमा उक्त विवरण खाली राख्ने व्यवस्था राखिएको छ।

निवेदन दिनका लागि जन्मस्थान, स्थायी बसोबास, स्थानीय तहको सिफारिस, जग्गाधनी प्रमाण वा मतदाता नामावलीजस्ता कागजात आवश्यक पर्नेछ। कागजात अभावमा स्थलगत सर्जमिन र तीन जना नागरिकद्वारा सनाखतका आधारमा पनि नागरिकता दिन सकिने व्यवस्था प्रस्तावमा छ।