खनाल र गौतमबीच डल्लुमा भेटवार्ता

काठमाडौं – नेकपा एकीकृत समाजवादीका सम्मानित नेता झलनाथ खनाल र हालै पार्टीमा प्रवेश गरेका वरिष्ठ नेता वामदेव गौतमबीच डल्लुमा भेटवार्ता भइरहेको छ।

अध्यक्ष माधवकुमार नेपालसँग बढ्दो भनाभनको बीचमा खनालले आफ्नै निवासमा गौतमसँग करिब आधा घण्टादेखि संवाद गरिरहेका छन्। खनालको सचिवालयका अनुसार, भेटमा समसामयिक राजनीतिक विषयमा छलफल भइरहेको छ।

हालैको एक अन्तर्वार्तामा खनालले “एमाले फुटाएर नयाँ पार्टी बनाउनु गल्ती भएको” अभिव्यक्ति दिएका थिए। त्यसको जवाफमा अध्यक्ष नेपालले “पार्टी छाडेर गए हुन्छ” भनेपछि दुवै नेताबीच सार्वजनिक रुपमा वाकयुद्ध सुरु भएको हो।

यता, वामदेव गौतम पनि पार्टीप्रति असन्तुष्ट देखिएका छन्। उनले आफूलाई जिम्मेवारी नदिए लामो समय पार्टीमा टिक्न नसक्ने चेतावनी दिइसकेका छन्।

यही परिस्थितिमा खनाल र गौतमबीचको भेटलाई राजनीतिक रूपमा महत्वपूर्ण मानिएको छ।