आस्था, सुरक्षा र सम्बन्धको पर्व रक्षाबन्धन तथा जनै पूर्णिमा देशभर उल्लासपूर्वक मनाइदैं

काठमाडौं – आस्था, धार्मिक विश्वास र पारिवारिक सम्बन्धको प्रतीक पर्व रक्षाबन्धन तथा जनै पूर्णिमा (ऋषि तर्पणी) शनिबार देशभर हर्षोल्लासका साथ मनाइदैं।

श्रावण शुक्ल पूर्णिमाको दिन वैदिक सनातन धर्मावलम्बीहरूले बिहानै नदी, ताल, पोखरीमा स्नान गरी गुरु पुरोहितबाट मन्त्रिएको नयाँ यज्ञोपवीत (जनै) र रक्षासूत्र (डोरो) धारण गरे। धार्मिक मान्यताअनुसार अभिमन्त्रित रक्षासूत्रले नकारात्मक तत्व, भय र रोगबाट सुरक्षा दिने विश्वास छ। तागाधारीहरूले आज पुरानो जनै फेरेर नयाँ धारण गरेका थिए, जसलाई आत्मशुद्धि र ज्ञानको निरन्तरताको प्रतीक मानिन्छ।

पर्वको सांस्कृतिक पक्षमा विशेष परिकार ‘क्वाँटी’ खाने परम्परा रहेको छ। ११ थरीका गेडागुडी मिसाएर बनाइने यो पौष्टिक परिकारले वर्षायामको चिसो हटाउने, पाचन सुधार्ने र रोग प्रतिरोधात्मक क्षमता बढाउने मान्यता छ।

तराई क्षेत्रमा दिदीबहिनीहरूले दाजुभाइको नाडीमा राखी बाँधी दीर्घायु र सफलताको कामना गर्ने तथा दाजुभाइले दिदीबहिनीलाई उपहारसहित सधैं रक्षा गर्ने वचन दिने परम्परा यस अवसरमा विशेष रह्यो। राखी परम्परा पहाडी क्षेत्रमा पनि विस्तार हुँदै सांस्कृतिक सद्भाव बलियो बनाउँदै गएको छ।

देशभरका प्रमुख धार्मिक स्थलहरूमा बिहानैदेखि भक्तजनहरूको भीड लागेको थियो। काठमाडौंको मणिचूड, रसुवाको गोसाइँकुण्ड, ललितपुरको कुम्भेश्वर, सिन्धुपाल्चोकको पाँचपोखरी, धनुषाको जनकपुरधामस्थित धनुषसागर र गङ्गासागर तथा जुम्लाको दानसाधु कुण्डलगायतका तीर्थस्थलमा विशेष मेला भई स्नान, पूजाआजा र धार्मिक अनुष्ठान सम्पन्न गरियो।