दशौं राष्ट्रिय खेलकुद प्रतियोगिताको मिति अब नसर्ने गरी तोक्न आग्रह: मुख्यमन्त्री कँडेल

कर्णाली प्रदेशका मुख्यमन्त्री यामलाल कँडेलले दशौं राष्ट्रिय खेलकुद प्रतियोगिता अब प्रभावित नहोस् भन्ने उद्देश्यले मिति तोक्दा नसर्ने गरी तोक्न संघीय सरकारलाई आग्रह गरेका छन्। आज सुर्खेतमा युवा तथा खेलकुद मन्त्री तेजु चौधरीसँग भएको छलफलमा मुख्यमन्त्री कँडेलले पटक–पटक मिति तोकिए पनि प्रतियोगिता नहुँदा नकारात्मक सन्देश गएको बताए ।  अब त्यस्तो गल्ती दोहोरिनु हुँदैन,  उनले भने,  हामी प्रतिबद्ध छौं, तयारीमा जुटेका छौं, तर आयोजक संघीय सरकार हो ।

मुख्यमन्त्री कँडेलले मिति तय गर्दा संघीय र प्रदेश सरकारबीच स्पष्ट तालिका र जिम्मेवारी तय गर्नुपर्ने सुझाव दिए। साथै, अघिल्लो तयारीमा देखिएको कमजोरी नदोहोऱ्याउन पनि सचेत गराए। उपसमितिहरूको गठनमा असन्तुष्टि व्यक्त गर्दै उनले भने, “जम्बो उपसमिति होइन, आवश्यक जनशक्ति ल्याएर प्रभावकारी बनाउनुहोस् । प्रधानमन्त्री केपी शर्मा ओलीले पनि प्रतियोगिता सर्न नदिन निर्देशन दिइसकेको भन्दै मुख्यमन्त्री कँडेलले सोहीअनुसार काम गर्न खेलकुद मन्त्रीलाई सुझाव दिए।

उनका अनुसार, प्रतियोगिता सफल बनाउन प्रदेश सरकार पुरै सक्रिय छ। रंगशालासहित बाँकी पूर्वाधारको काम तत्काल अघि बढाइने र रिक्त रहेका खेलकुद परिषद्का पदहरूमा नियुक्तिको प्रक्रिया पनि सुरू भइसकेको जानकारी दिए । खेलकुद मन्त्री चौधरीले प्रतियोगिताको मिति अब नसर्ने गरी तयारी भइरहेको भन्दै ढुक्क रहन आग्रह गरे। उनले २४ वटा खेलको लागि सुर्खेत आसपास क्षेत्रको तयारी भइसकेको बताए । छलफलमा आर्थिक मामिला मन्त्री राजीवबिक्रम शाह, सामाजिक विकास मन्त्री धनश्याम भण्डारी लगायतको उपस्थिति रहेको थियो ।