आजको मौसम : जलवाष्पयुक्त हावाको प्रभाव कमजोर, कतै भारी वर्षाको सम्भावना

  साउन २२ – देशभर मनसुन सक्रिय रहेको बेला जलवाष्पयुक्त हावाको प्रभाव केही कमजोर देखिएको जल तथा मौसम विज्ञान विभागले जनाएको छ। यसका कारण केही स्थानमा वर्षा हुने भए पनि धेरै क्षेत्रमा वर्षा कम हुने देखिएको छ।

दिउँसो कोसी र लुम्बिनी प्रदेशका पहाडी क्षेत्रमा सामान्य बदली रहनेछ भने बाँकी भूभागमा आंशिक बदली रहने अनुमान गरिएको छ।

कोसी र लुम्बिनी प्रदेशका पहाडी तथा तराई भूभागका केही स्थानमा र अन्य प्रदेशका थोरै स्थानमा मध्यम वर्षाको सम्भावना छ।

कोसी, वाग्मती र गण्डकी प्रदेशका पहाडी क्षेत्रका एकदुई स्थानमा भने भारी वर्षा हुनसक्ने विभागले जनाएको छ।

रातिको समयमा देशभर सामान्यतया बदली रहनेछ। यस अवधिमा पनि मधेस, कोसी र लुम्बिनी प्रदेशका पहाडी तथा तराई भूभागका केही स्थानमा मध्यम वर्षाको सम्भावना छ।

कोसी प्रदेशको पहाडी क्षेत्रमा एकदुई स्थानमा भारी वर्षा पनि हुनसक्ने विभागको अनुमान छ।

हाल मनसुनको न्यूनचापीय रेखा नेपालको तराई भूभागमा औसत स्थानको उत्तरतर्फ अवस्थित छ। मनसुन सक्रिय भए पनि जलवाष्पयुक्त हावाको प्रभाव कमजोर भएकाले देशव्यापी रूपमा व्यापक वर्षाको सम्भावना भने न्यून रहेको विभागको भनाइ छ।