चक्रे मिलनको बर्थडे पाटीमा प्रहरीको छापा, ४७ जना पक्राउ

काठमाडौँ।  प्रहरीले गण्डागर्दीमा संलग्न चक्रे मिलन (मिलन गुरुङ) सहित ४७ जना भन्दा बढीलाई पक्राउ गरेको छ । गएराति ठमेल र महाराजगन्ज क्षेत्रबाट प्रहरीले उनीहरुलाई पक्राउ गरेको हो ।

ठमेल र महाराजगन्ज क्षेत्रमा सक्रिय रहेको प्रहरीले सादा पोशाकमा अपरेसन गर्दै चक्रे मिलनसहित ४७ जना भन्दा बढीलाई नियन्त्रणमा लिएको हो।
विशेष सूचनाको आधारमा काठमाडौँ प्रहरी परिसर र उपत्यका अपराध अनुसन्धान कार्यालयको संयुक्त टोलीले अपरेसन सञ्चालन गरेको थियो।

प्रहरीका अनुसार चक्रे मिलनलाई महाराजगन्जस्थित साम्बाला होटलबाट पक्राउ गरिएको हो, जहाँ उनी जन्मदिनको पाटी मनाइरहेका थिए।
यस्तै, ठमेल र महाराजगन्ज क्षेत्रबाट अवैध गतिविधिमा संलग्न केही अन्य व्यक्तिहरूलाई पनि पक्राउ गरिएको छ।

उपत्यका प्रहरी कार्यालयका एआईजी टेकबहादुर तामाङका अनुसार, पक्राउ परेकाहरूमा विगतदेखि नै हप्ता असुली र झैझगडा गर्ने व्यक्तिहरू समावेश छन्।

यही क्रममा, ‘सानुभाइ’को नामले चिनिने युवराज गुरुङलाई पनि प्रहरीले बुधबार राति पक्राउ गरेको थियो।
उनी भक्तपुरको नर्सिङ चोकस्थित नगरकोट दोहोरीमा भएको झगडामा संलग्न थिए।

रेस्टुराँ र रात्रिक्लबमा बसेर विवाद गरिने र हप्ता असुली हुने गुनासोपछि प्रहरीले गुण्डागर्दीविरुद्ध काठमाडौं उपत्यकामा एक विशेष अपरेसन चलाएको थियो।

पक्राउ परेकाहरूको स्क्रिनिङपछि थप अनुसन्धान हुने प्रहरीले जनाएको छ।