१०औँ राष्ट्रिय खेलकुद मंसिरभित्र सम्पन्न गर्न प्रधानमन्त्रीको निर्देशन

प्रधानमन्त्री केपी शर्मा ओलीले १०औँ राष्ट्रिय खेलकुद प्रतियोगिता आगामी मंसिरभित्र सम्पन्न हुने गरी तयारी गर्न युवा तथा खेलकुद मन्त्रालय र राष्ट्रिय खेलकुद परिषद्लाई निर्देशन दिएका छन् । सोमबार साँझ बालुवाटारमा आयोजित छलफलमा प्रधानमन्त्री ओलीले प्रतियोगिता देशको प्रतिष्ठासँग जोडिएको विषय भएकोले चुस्त, प्रभावकारी र समन्वयात्मक ढंगले तयारी अघि बढाउन निर्देशन दिएका हुन्। उनले सन् २०२६ मा जापानमा हुने एसियन गेम्सको पूर्वसन्ध्यामा राष्ट्रिय प्रतियोगिता सम्पन्न गर्नु विशेष महत्त्वको भएको बताउँदै यसलाई भव्य र व्यवस्थित बनाउनुपर्ने धारणा राखे।

प्रधानमन्त्री ओलीले प्रतियोगिताको मिति र स्थानलाई राम्रो अध्ययन गरी यथाशीघ्र टुंगोमा पुगी पछि फेरबदल नगर्न आग्रह गरे। राखेपका संरक्षकसमेत रहेका ओलीले मन्त्रालय र परिषद्को नेतृत्वबीच सहकार्य र समन्वय अपरिहार्य भएको पनि दोहोऱ्याए । छलफलमा युवा तथा खेलकुदमन्त्री तेजुलाल चौधरी, मन्त्रालयका सचिव डा। हरिप्रसाद लम्साल, परिषद्का उपाध्यक्ष ध्रुव आचार्य, सदस्य–सचिव टङ्कलाल घिसिङलगायतको उपस्थिति थियो । यसअघि २–९ मंसिर २०८१ मा कर्णाली प्रदेशको राजधानी सुर्खेतमा प्रतियोगिता आयोजना हुने भनिए पनि मिति पटक–पटक सरेको थियो। प्रतियोगिताको भविष्य अझै अन्योलमै रहँदा प्रधानमन्त्रीको निर्देशनले अब तयारीमा गति आउने अपेक्षा गरिएको छ ।