जंगली च्याउको स्वाद महंगो पर्‍यो: जुम्लामा एकै परिवारका पाँचजना अस्पताल भर्ना

जुम्ला। जुम्लाको गुठिचौर गाउँपालिकामा जंगली च्याउको स्वादले एकै परिवारका पाँच जनालाई अस्पताल पुऱ्याएको छ। गुठिचौर-१, मणिसाँघुका ६० वर्षीय लेकखमान महतराको परिवारले आइतबार दिउँसो जंगलबाट ल्याएको च्याउ पकाएर खाएपछि गम्भीर बिरामी परेका हुन्। बिरामी हुनेहरूमा लेकखमानसँगै ५८ वर्षीया राजकुमारी महतरा, ४५ वर्षीया कल्पना रावत, २८ वर्षीया सपना महतरा बिष्ट र एक ३ वर्षीय बालक पुजन बिष्ट छन्। च्याउ खाए लगत्तै पेट दुख्ने, वान्ता हुने जस्ता लक्षण देखिएपछि उनीहरूलाई तत्काल कर्णाली स्वास्थ्य विज्ञान प्रतिष्ठानमा लगिएको थियो, जहाँ उनीहरुको उपचार भइरहेको र अवस्था सामान्य रहेको प्रहरीले जनाएको छ।

यो घटनाले वर्षायाममा जंगली च्याउ सेवन गर्दाको जोखिमलाई फेरि एकपटक सतहमा ल्याएको छ। नेपालका ग्रामीण भेगमा सही पहिचान बिना च्याउ सेवन गर्दा बर्सेनि यस्ता घटनाहरू दोहोरिने गरेका छन्। घटनाबारे अनुसन्धान गरिरहेको प्रहरीले पनि स्थानीयलाई अपरिचित जंगली च्याउ नखान र सचेत रहन विशेष अनुरोध गरेको छ। स्वादको लागि गरिने सानो लापरवाहीले ज्यानै जोखिममा पर्नसक्ने हुँदा यसतर्फ सबै सजग हुनु जरुरी छ।