जाजरकाेट वन कार्यालय प्रमुखमाथि आक्रमण गर्ने दुई जना  पक्राउ 

जाजरकाेट। जाजरकाेट डिभिजन वन कार्यालयका प्रमुखमाथि कुटपिट गरी फरार रहेका दुई जना युवालाई प्रहरीले पक्राउ गरेको छ । जिल्ला प्रहरी कार्यालय, जाजरकोटले उनीहरूलाई बाँकेको कोहलपुरबाट पक्राउ गरी सार्वजनिक गरेको हो ।

पक्राउ पर्नेमा रुकुम पश्चिम चौरजहारी नगरपालिका वडा नं. ३ का १९ वर्षीय आशिष बिक्रम शाही र जाजरकोटको भेरी नगरपालिका वडा नं. ३ का २२ वर्षीय कुशल कुमाल रहेका छन् ।

गत असार २२ गते अपरान्ह ४ बजे भेरी नगरपालिका–३, तल्लो थाप्लेस्थित डिभिजन वन कार्यालयमा प्रवेश गरी अज्ञात समूहले कार्यालय प्रमुख अमर प्रसाद साह र सोही स्थानमा रहेका भेरी नगरपालिका–७ का बिराजमान शाहीमाथि कुटपिट गरेको थियो । प्रहरीका अनुसार, कालो मास्क लगाएर आएका उनीहरूले कार्यालयका सरकारी कागजातहरू समेत च्यातेर फरार भएका थिए ।

घटनापछि अनुसन्धानमा जुटेको प्रहरीले विशेष सूचनाका आधारमा उनीहरू बाँकेको कोहलपुर क्षेत्रमा लुकेर बसेको पत्ता लगाएको थियो । सोही सूचनाका आधारमा इलाका प्रहरी कार्यालय, कोहलपुरसँगको समन्वयमा खटिएको प्रहरी टोलीले आज (बुधबार) बिहान ५ बजे कोहलपुर नगरपालिका–१२, चप्परगौंडीबाट उनीहरूलाई पक्राउ गरेको हो ।

जिल्ला प्रहरी कार्यालय, जाजरकोटका सूचना अधिकारी एवं प्रहरी निरीक्षक हरि राम डाँगीका अनुसार पक्राउ परेका दुवै जनालाई आपराधिक उपद्रव सम्बन्धी कसुरमा अनुसन्धानका लागि जिल्ला अदालत, जाजरकोटबाट ३ दिनको म्याद थप गरी हिरासतमा राखिएको छ । घटनाबारे थप अनुसन्धान भइरहेको प्रहरीले जनाएको छ ।