- साउन ७, २०८२
- No Comment
- 93
भेरी करिडोरमा टिपर दुर्घटना, ३ जना बेपत्ता

मंगलबार मध्यरातमा भेरी नदीको उर्लंदो भेलमा टिपर खस्दा चालकसहित तीन जना बेपत्ता भएका छन्। यो दुःखद घटना रुकुमपश्चिमको आठबीसकोट–१४, पिपलचौरमा भएको हो, जहाँ भेरी करिडोर निर्माणमा प्रयोग गरिएको टिपर सडकबाट नदीमा खसेको थियो ।
जाजरकोटको नलगाड नगरपालिकास्थित दल्लीबाट रिम्नातर्फ आउँदै गरेको यती विल्डर्सको रा१क १५०१ नम्बरको टिपर दुर्घटनामा परेको हो । इलाका प्रहरी कार्यालय, रिम्नाका अनुसार, घटनालगत्तै रुकुमपश्चिम र जाजरकोटको संयुक्त प्रहरी टोली बेपत्ताहरूको खोजीमा जुटेको छ। यद्यपि, मनसुनका कारण भेरी नदीमा पानीको बहाव निकै बढेकाले खोजी तथा उद्धार कार्य अत्यन्तै चुनौतीपूर्ण बनेको छ । प्रहरीले जनाएअनुसार हालसम्म बेपत्ता भएका तीनै जनाको पहिचान खुल्न सकेको छैन, जसले गर्दा घटनाको पूर्ण विवरण आउन बाँकी छ ।