एमाले बैठक दोस्रो दिन जारी, धारणा राख्न ३ मिनेट समय

नेपाल कम्युनिस्ट पार्टी (एमाले) को केन्द्रीय कमिटीको दोस्रो दिनको बैठक आज पनि ललितपुरको च्यासलस्थित पार्टी मुख्यालयमा जारी छ। बैठकमा केन्द्रीय सदस्यहरूले विधान संशोधन र संगठनात्मक प्रस्तावमाथि धारणा राख्ने क्रम जारी रहेको छ । पार्टी प्रचार तथा प्रकाशन विभाग प्रमुख राजेन्द्र गौतमका अनुसार, उपाध्यक्ष विष्णुप्रसाद पौडेलद्वारा प्रस्तुत विधान संशोधन प्रतिवेदन र महासचिव शंकर पोखरेलको संगठनात्मक प्रतिवेदनमाथि आज कोशी, बागमती, लुम्बिनी, कर्णाली र सुदूरपश्चिम प्रदेशका केन्द्रीय सदस्यहरूले विचार राख्ने कार्यक्रम छ।

हिजोको बैठकमा गण्डकी, मधेस, प्रदेश विशेष र सम्पर्क समन्वय कमिटीबाट प्रतिनिधित्व गर्ने ४९ जना केन्द्रीय सदस्यहरूले धारणा व्यक्त गरेका थिए। बैठकमा हरेक सदस्यलाई बढीमा तीन मिनेट समय दिइएको छ । सचिवालय र पोलिटब्यूरोबाहेकका सदस्यहरू मात्र धारणा राख्न पाउने व्यवस्था गरिएको छ । केही सदस्यले लिखित रूपमा धारणा बुझाएका छन् । गौतमका अनुसार बैठकपछि समसामयिक विषय समेटिएको घोषणापत्र जारी गर्दै आजै बैठक सम्पन्न गरिने कार्यक्रम रहेकाे छ ।