चिसो मौसममा देखापर्ने प्रमुख १० स्वास्थ्य समस्या, यस्ता छन बच्ने उपाय

 काठमाडौं — देशभर चिसो बढेसँगै विभिन्न स्वास्थ्य समस्या देखापर्ने जोखिम पनि बढेको छ। काठमाडौं उपत्यकासहित अधिकांश स्थानमा वर्षा, हिमपात र बाक्लो हुस्सुका कारण तापक्रम घट्दा बालबालिका र वृद्धवृद्धामा स्वास्थ्य समस्या बढी देखिने चिकित्सकहरू बताउँछन्।

विशेषगरी लामो समयसम्म चिसो मौसम कायम रहँदा शरीरमा विभिन्न रोगको जोखिम बढ्ने भएकाले सचेत रहन आवश्यक देखिएको छ। चिकित्सकका अनुसार जाडोमा देखिने प्रमुख स्वास्थ्य समस्या र तिनबाट बच्ने उपायहरू यस्ता छन्:

हाइपोथर्मिया र फ्लुको जोखिम
अत्यधिक चिसोका कारण शरीरको तापक्रम घटेर हाइपोथर्मिया हुन सक्छ, जसले गम्भीर अवस्थामा ज्यानसमेत जोखिममा पार्न सक्छ। त्यस्तै फ्लु संक्रमण पनि जाडोमा तीव्र रूपमा फैलिने गर्दछ। यस्ता समस्याबाट बच्न शरीर न्यानो राख्ने, भीडभाडबाट टाढा रहने र सरसफाइमा ध्यान दिनुपर्ने सुझाव दिइएको छ।

रुघाखोकी र श्वासप्रश्वास सम्बन्धी समस्या
चिसो मौसममा रुघाखोकी तथा दम, निमोनिया जस्ता श्वासप्रश्वास सम्बन्धी रोगको जोखिम बढ्छ। धुलो, धुवाँ र प्रदूषणबाट टाढा रहनुका साथै मास्क प्रयोग गर्न चिकित्सकले सुझाव दिएका छन्।

हिउँले खाने र जोर्नी दुखाइ
हिमाली तथा उच्च पहाडी क्षेत्रमा बसोबास गर्ने वा भ्रमण गर्नेहरूमा हिउँले खाने समस्या देखिन सक्छ। साथै जाडोमा जोर्नी दुखाइ पनि बढ्ने गर्दछ। शरीरका सबै भाग न्यानो राख्न र चिसोसँग प्रत्यक्ष सम्पर्कबाट बच्न आवश्यक हुन्छ।

हृदयघात र कार्बन मोनोअक्साइडको जोखिम
चिसो मौसममा हृदयघात को जोखिम पनि बढ्ने देखिएको छ। त्यस्तै बन्द कोठामा आगो वा हिटर प्रयोग गर्दा कार्बन मोनोअक्साइड विषाक्तता हुनसक्छ, जसले ज्यानसमेत लिन सक्छ। त्यसैले कोठा हावापसार हुने बनाउनु अत्यावश्यक छ।

छाला सुख्खा हुने र डायरियाको समस्या
जाडोमा सुख्खा छाला तथा नोरोभाइरस संक्रमण (विन्टर डाइरिया) को समस्या पनि देखिन्छ। छालाको हेरचाह, तातो र झोलिलो खानेकुरा तथा सरसफाइमा ध्यान दिनु आवश्यक छ।

स्वास्थ्य विज्ञहरूका अनुसार चिसो मौसममा न्यानो कपडा लगाउने, सन्तुलित आहार लिने, नियमित व्यायाम गर्ने र व्यक्तिगत सरसफाइमा ध्यान दिनु नै प्रमुख बच्ने उपाय हुन्। कुनै पनि समस्या देखिएमा समयमै स्वास्थ्य संस्थामा परामर्श लिनुपर्ने सुझाव दिइएको छ।