एमाले सचिवालय बैठक भोलि बस्दै, महाधिवेशन तयारीमा केन्द्रित

 नेकपा (एमाले)ले भोलि (बिहीबार) दिउँसो १ बजे पार्टी केन्द्रीय कार्यालय, च्यासलमा सचिवालय बैठक बस्ने भएको छ। बैठक साउन २ र ५ गते तय गरिएको पोलिटब्युरो तथा केन्द्रीय कमिटी बैठकको तयारीका लागि बोलाइएको प्रचार विभाग प्रमुख राजेन्द्र प्रसाद गौतमले जानकारी दिएका छन्। बैठकमा पार्टीको आगामी महत्त्वपूर्ण कार्यसूची, विशेषगरी भदौ २०, २१ र २२ गते ललितपुरको गोदावरीस्थित सनराइज हलमा हुने विद्यान महाधिवेशनको तयारीबारे छलफल हुने जनाइएको छ।

महाधिवेशन नजिकिँदै जाँदा पार्टीभित्र आन्तरिक ध्रुवीकरण देखिएको छ। एक पक्षले पार्टीमा ७० वर्ष उमेरहद र दुई कार्यकालभन्दा बढी नेतृत्वमा बस्न नपाउने व्यवस्था गर्नुपर्ने माग गरिरहेको छ भने, अध्यक्ष केपी शर्मा ओली निकट समूहले भने सो प्रावधान पहिले नै खारेज भइसकेको दाबी गरेको छ। सचिवालय बैठकले यी विवादास्पद विषयहरूमाथि पनि प्रारम्भिक छलफल गर्ने अपेक्षा गरिएको छ।