बीमा प्राधिकरणका अध्यक्ष शरद ओझा निलम्बित

 नेपाल बीमा प्राधिकरणका अध्यक्ष शरद ओझा निलम्बित भएका छन्। कार्यप्रणाली र जिम्मेवारी पालनमा प्रश्न उठेपछि सोमबार बसेको मन्त्रिपरिषद् बैठकले छानबिन गर्न तीन सदस्यीय समिति गठन गरेसँगै उनी स्वतः निलम्बनमा परेका हुन्।

पूर्वन्यायाधीश कृष्ण गिरीको नेतृत्वमा गठन गरिएको समितिमा कपिलदेव ओली र जीवनप्रकाश सिटौला सदस्य छन्। बीमा ऐन २०७९ को दफा १२ को उपदफा ३ अनुसार छानबिन समिति गठन भएपश्चात् सम्बन्धित अध्यक्ष वा सदस्य स्वतः निलम्बनमा पर्ने प्रावधान छ।

शरद ओझामाथि फर्जी कागजात पेश गरी नियुक्ति लिएको आरोप छ। यस सम्बन्धमा सर्वोच्च अदालतमा रिट दर्ता भएको छ भने अख्तियार दुरुपयोग अनुसन्धान आयोगले पनि अनुसन्धान अघि बढाएको छ।

सरकारले उनलाई पदमुक्त गर्ने प्रक्रिया अगाडि बढाइसकेको स्रोतले जनाएको छ।