बामदेव गौतम एकीकृत समाजवादीमा प्रवेश, साउन २ गते एकता घोषणा हुने

नेकपा एकता राष्ट्रिय अभियानका अध्यक्ष बामदेव गौतम नेकपा (एकीकृत समाजवादी) पार्टीमा समावेश हुने भएका छन्। साउन २ गते राष्ट्रिय सभागृहमा आयोजना हुने विशेष समारोहमार्फत नेकपा एकता राष्ट्रिय अभियान र एकीकृत समाजवादीबीच एकता घोषणा गरिने भएको छ। दुवै पक्षबीच भएको सहमतिपत्रमा अध्यक्ष माधवकुमार नेपाल र बामदेव गौतमले हस्ताक्षर गरेका छन्।

सहमतिमा नेपालको कम्युनिस्ट आन्दोलनलाई एकताबद्ध गर्ने ऐतिहासिक आवश्यकता महसुस गर्दै दुवै संगठन एक हुने उल्लेख छ। पूर्व एमाले र माओवादी केन्द्रबीचको एकता सर्वोच्च अदालतबाट खारेज भएपछि गौतमले छुट्टै नेकपा एकता राष्ट्रिय अभियान सञ्चालन गर्दै आएका थिए। उनले शुरुमा नेकपा एमालेमै फर्किने प्रयास गरेका थिए, तर अध्यक्ष केपी शर्मा ओलीको अनिच्छाले उनलाई रोकिएको थियो।

अब भने गौतमले ओली नेतृत्वको एमालेबाट अलग भएर बनेको माधव नेपाल नेतृत्वको एकीकृत समाजवादीसँग औपचारिक रूपमा एकता गर्ने सहमति जनाएका छन्।