भेरीगंगामा ट्रक र फोर्स गाडी ठोक्किँदा ८ घाइते

 सुर्खेत । सुर्खेतको भेरीगंगा नगरपालिकामा यात्रुवाहक फोर्स गाडीलाई ट्रकले ठक्कर दिँदा ८ जना यात्रु घाइते भएका छन्। शनिबार साँझ नेपालगन्जबाट सुर्खेततर्फ आउँदै गरेको क.प्र. ०२-००१ ख ०८५० नम्बरको फोर्स गाडीलाई विपरीत दिशाबाट आइरहेको सु.प.प्र. ०१-००१ ख २९३४ नम्बरको ट्रकले भेरीगंगा नगरपालिका–५ स्थित सडक खण्डमा ठक्कर दिएको हो।

भएको उक्त दुर्घटनामा घाइते भएका सबैलाई थप उपचारका लागि नेपालगन्ज पठाइएको जिल्ला प्रहरी कार्यालय सुर्खेतले जानकारी दिएको छ।

 फोर्स गाडीमा ३८ वर्षीय चालक तेज बहादुर कार्कीसहित ११ जना सवार थिए। जसमध्ये ८ जना घाइते भएका छन् भने अन्य तीन जना सकुशल रहेका छन्।

दुर्घटनापछि ट्रक चालक फरार भएका थिए। तर बबईस्थित प्रहरी पोष्टले उनलाई नियन्त्रणमा लिएको र घटनाबारे थप अनुसन्धान भइरहेको जिल्ला प्रहरी कार्यालय सुर्खेतले जनाएको छ।