जुम्लाको हिमा गाउँपालिका बालविवाहमुक्त पालिकाका रूपमा घोषणा

जुम्ला । जुम्लाको हिमा गाउँपालिकालाई बालविवाहमुक्त पालिकाका रूपमा घोषणा गरिएको छ। केन्द्रीय सरकारका महिला, बालबालिका तथा ज्येष्ठ नागरिकमन्त्री नवलकिशोर शाह सुडीले सोमबार एक विशेष कार्यक्रममार्फत हिमालाई कर्णाली प्रदेशको पहिलो बालविवाहमुक्त पालिकाका रूपमा घोषणा गरेका हुन्।

कार्यक्रममा मन्त्री सुडीले बालविवाहलाई सामाजिक कुरीति र कुसंस्कृतिको रूपमा व्याख्या गर्दै हिमाको अभियानले मुलुकभर सकारात्मक सन्देश फैलाएको बताए। “हिमाले गरेको कार्य समाज परिवर्तनका लागि अत्यन्तै प्रेरणादायी छ,” उनले भने, “यो पहलले कर्णाली प्रदेशलाई नयाँ पहिचान दिनेछ।”

हिमा गाउँपालिकाले झन्डै तीन वर्षदेखि सञ्चालन गर्दै आएको निरन्तर सचेतनामूलक अभियानपछि पालिका नै बालविवाहमुक्त घोषित भएको हो। यसअघि पालिकाभित्रका सबै सात वडाहरू बालविवाहमुक्त क्षेत्रका रूपमा घोषणा भइसकेका थिए।

बालविवाहसम्बन्धी राष्ट्रिय रणनीति २०७२ र बालविवाहमुक्त सर्वेक्षण तथा रणनीति २०७९ को मार्गदर्शनअनुसार गरिएको अभियानले २०८०/८१ मा विवाह गरेका १३२ व्यक्तिमध्ये सबैको वैधानिक उमेर पुगेको पुष्टि भएको छ। महिला तथा बालबालिका शाखाकी राज्यलक्ष्मी रावलद्वारा प्रस्तुत प्रतिवेदनअनुसार, पछिल्ला तीन वर्षमा पालिकाभित्र कुनै पनि बालविवाह भएको छैन।

गाउँपालिका अध्यक्ष लक्ष्मणबहादुर शाहीले बालविवाहजस्तो सामाजिक विकृति अन्त्य गर्नु समाज सुदृढ बनाउने दिशामा उठाइएको महत्वपूर्ण कदम भएको बताए। “हिमाले थालेको यो अभियानले सामाजिक रुपान्तरणमा ठूलो योगदान पुर्‍याउनेछ,” उनले भने, “किशोरकिशोरीको शिक्षा, स्वास्थ्य र रोजगारीमा यसले सकारात्मक प्रभाव पार्नेछ।”

अभियानको क्रममा सडक नाटक, देउडा गीतजस्ता बस्तीस्तरका सचेतनामूलक कार्यक्रमहरू, विद्यालय, वडा र पालिका स्तरमा बालसंरक्षण नीतिहरू, बालअधिकार संरक्षण समिति तथा विशेष निर्देशनाहरू तयार पारिएको थियो।