आजको मौसम 

काठमाडौँ । देशभर हाल पश्चिमी वायु, स्थानीय वायु तथा बंगालको खाडी र अरब सागरबाट आएको जलवाष्पयुक्त हावाको आंशिक प्रभावका कारण पाँच प्रदेशमा हल्का देखि मध्यम वर्षाको सम्भावना रहेको छ भने तराईका केही भू-भागमा तातो हावा बहिरहेको मौसम पूर्वानुमान महाशाखाले जनाएको छ।

महाशाखाका अनुसार कर्णाली र सुदूरपश्चिम प्रदेश लगायत देशका पहाडी क्षेत्रहरूमा हाल आंशिकदेखि सामान्य बदली रहेको छ, भने बाँकी भागमा मौसम मुख्यतया सफा देखि आंशिक बदली रहेको  छ।

दिउँसो कोशी, लुम्बिनी, गण्डकी र सुदूरपश्चिम प्रदेशका थोरै स्थानहरूमा मेघ गर्जन र चट्याङ्गसहित हल्का देखि मध्यम वर्षाको सम्भावना छ।
उच्च पहाडी तथा हिमाली क्षेत्रमा हल्का वर्षा र हिमपातको सम्भावना समेत रहेको छ।

राति कोशी, मधेश, गण्डकी लगायत पहाडी भू-भागहरूमा आंशिक देखि सामान्य बदली रहनेछ, भने अन्य क्षेत्रहरूमा मौसम मुख्यतया सफा रहने अनुमान गरिएको छ।

महाशाखाले विशेष गरी कोशी, मधेश, गण्डकी, बागमती र सुदूरपश्चिम प्रदेशका थोरै स्थानहरूमा मेघ गर्जन, चट्याङ्ग र वर्षाको सम्भावनाले दैनिक जनजीवन, कृषि, स्वास्थ्य, सडक तथा हवाई यातायातमा असर पर्न सक्ने भएकाले आवश्यक सतर्कता अपनाउन आग्रह गरेको छ।